ԵՐԵՎԱՆ, 2 հունիսի – Sputnik, Արմենուհի Մխոյան. Շիրակի մարզի առաջին ատյանի դատարանում այսօր շարունակվեց Գյումրիում 20-ամյա մոր կողմից մանկահասակ երեխայի սպանության գործով դատական նիստը: Դատարանը` նիստը նախագահող դատավոր Ջոն Հայրապետյանի գլխավորությամբ, լսեց տուժողի իրավահաջորդին` սպանված երեխայի հորը՝ Արթուր Ալեքսանյանին: Պատասխանելով մեղադրողի հարցերին` նա տեղեկացրեց, որ ամեն ինչ սկսվել է կնոջ՝ Անի Մինասյանի հեռանալուց։
Անցյալ տարվա օգոստոսի 31-ին հայտի դարձավ, որ Գյումրու Բուլվարային թաղամասի աղբանոցում մոտ մեկ տարեկան աղջիկ երեխայի դի է հայտնաբերվել։ Ավելի ուշ Քննչական կոմիտեն հայտնեց, որ երեխայի սպանության համար մեղադրվում է մայրը։
«Առաջին անգամ 1 շաբաթով երեխային թողեց ու գնաց` ոչ մի բան չասելով, այդ ժամանակ եղբոր տանն էր ապրում: Հետո հետ եկավ, ոչ մի բան չասեց: Այդ անգամ ներեցի, գիտեի, որ եղբոր տանն է եղել: Այդ ժամանակ երեխային մայրս էր նայում»,- պատմեց Արթուրը։
Նրա խոսքով` 1 ամիս անց կինն արդեն երկրորդ անգամ է հեռացել` կրկին ոչ մեկին ոչինչ չասելով ու թողնելով երեխային: Այդ ընթացքում, ըստ Արթուրի, Անիի եղբոր հետ փնտրել են նրանու ոչ մի տեղ չեն գտել, 1 շաբաթ անց տատը զանգել, ասել է, որ Անին գտնվել է ու ապրում է մորաքրոջ տանը, մինչ այդ էլ ընկերուհու տանն է եղել։ Սակայն որոշ ժամանակ անց մորաքրոջ տնից տեղափոխվել ու ապրել է վարձակալած բնակարանում:
«Այդ ընթացքում երեխային կրկին մայրս էր նայում, բայց զգալով, որ երեխան մոր կարիք ունի ու հաշվի առնելով մայրիկիս առողջական վիճակը` երեխայի հանձնեցինք մորը՝ պայմանավորվելով, որ շաբաթական 5 հազար դրամ գումարով ու երեխային անհրաժեշտ հագուստով ու պարագաներով կապահովենք, բայց իրեն այլևս հետ չեմ ընդունի, ի՞նչ գիտեմ` ուր է եղել այդ ընթացքում»,- նշեց տուժողի իրավահաջորդը` ավելացնելով, որ տնից երկրորդ անգամ գնալիս Անին հետը վերցրել էր իր ամբողջ ոսկեղենը ՝ 600-700 հազար դրամի չափով: Դեպքի օրը երեխայի հայրը Էջմիածնում է եղել, կատարված մասին իմացել է ուշ երեկոյան:
Անդրադառնալով երեխայի հուղարկավորությանը` Արթուրը նշեց, որ երեխային իրենք են հողին հանձնել ընտանեկան գերեզմանոցում:
«Անիի հարազատներից ոչ մեկը չի եկել, չգիտեն, թե երեխան որտեղ է թաղված»,-հավելեց նա:
Մեղադրողը հարցրեց` ինչ պատիժ է ակնկալում իր երեխային սպանելու համար։
«Արժանի դատավճիռ: Հային վայել չէ սեփական երեխային սպանելը, արդարացի դատավճիռ եմ պահանջում, հարգելի՛ դատավոր»,– պատասխանեց Արթուրը:
Դատական նիստի ընթացքում խոսեց նաև սպանված երեխայի հայրական տատը` Գայանե Ալեքսանյանը։
««Ջան»–ից բացի ուրիշ բան մեր տանը չի լսել: Չեմ կարող բացատրել իր երեխային թողնելու ու տանից 2 անգամ լքելու փաստը,-ասաց նա` վստահեցնելով, որ Անին մինչ տնից հեռանալը նորմալ վարք է դրսևորել, վարքագծային փոփոխություններ նկատել են տնից բացակայելուց հետո:– Ոչ մի բան չէր ասում հեռանալու պատճառի մասին, վարձակալած բնակարանի տեղն էլ չէր ուզում, որ իմանանք, դրա համար էլ որդիս ու ես երեխայի համար գումարն ու իրերը փոխանցում էինք հրապարակում»:
Տիկին Գայանեն անդրադարձավ նաև երեխային մանկատուն հանձնելու Անիի մտադրության մասին` շեշտելով, որ իրենք այդ մասին չեն իմացել։
«Երբ Անիի տատը զանգեց ու հարցրեց` մենք իմացե՞լ ենք, որ Անին գնացել է մարզպետարան՝ երեխային մանկատուն հանձնելու ցանկությամբ, նոր իմացանք դրա մասին: Այդ ժամանակ խոսեցի, ասեցի` հրաժարվի երեխայից, մենք կպահենք, ինքն ասաց` ո՛չ, իմ երեխան է, ես կպահեմ»,– պատմեց նա:
Դատական հաջորդ նիստը կկայանա հունիսի 31-ին։ Ի դեպ, ինչպես նախորդ դատական նիստերին, այս անգամ ևս դահլիճում ներկա չէին Անիի հարազատները:
Գյումրու աղբանոցում գտնված երեխայի մայրը մեղքը չի ընդունում, հայրը` արժանի պատիժ պահանջում
Ըստ մեղադրական եզրակացության` Անի Մինասյանին մեղադրանք է առաջադրվել այն բանի համար, որ նա 2019թ. օգոստոսի 30-ին, ժ.22:00-24:00-ն ընկած ժամանակահատվածում, մանկահասակ դստերը` 16.09.2018թ. ծնված Գ. Ալեքսանյանին կյանքից զրկելու դիտավորությամբ, իր փաստացի բնակության վայրի բնակարանում կպչուն ժապավենով կապել է վերջինիս ձեռքերը և ոտքերը, բերանին փաթաթել կիսաշրջազգեստ, որից հետո նրան բնակարանից տեղափոխել և դրել է մոտակայքում` Շիրակացի փողոցում տեղակայված աղբարկղներից մեկի մեջ, ինչի հետևանքով երեխան մահացել է: 2019 թվականի օգոստոսի 31-ին ՀՀ քրեական օրենսգրքի 104-րդ հոդվածի 1-ին մասի հատկանիշներով հարուցվել է քրեական գործ:
2019 թվականի դեկտեմբերի 25-ին կայացած դռնբաց դատական նիստում որոշվել էր մեղադրյալ Անի Աշոտի Մինասյանի նկատմամբ ընտրված խափանման միջոց կալանավորումը թողնել անփոփոխ:
