ԵՐԵՎԱՆ, 1 հունիսի – Sputnik. Վատիկանի թանգարանները գրեթե երեք ամսվա ընդմիջումից հետո վերաբացվում են երկար աշխատանքային օրով և միաժամանակ սահմանափակ ռեժիմով։ Տեղեկությունը հաղորդում է ՌԻԱ Նովոստին։
«Եռամսյա դադարից հետո ձեզ և մեզ համար հնարավորություն է ստեղծվել վայելելու այս հավաքածուները այս ժամանակներում, որի մասին ընդամենը հինգ-վեց ամիս առաջ դժվար էր անգամ պատկերացնելը»,-հայտարարել է Յատտան։
Նրա խոսքով՝ էքսկուրսիայի ընթացքում ոչ միայն կարելի է շրջել թանգարանի սրահներով, այլ նաև տեսնել, թե մեկուսացման ընթացքում ինչ է հասցրել անել թանգարանի ղեկավարությունը։
Բացի մշտական մետաղադետեկտորից և պայուսակների ռենտգենյան սքաներից, Մուտքի մոտ, հաճախորդներին է սպասում նաև ախտահանիչ գելով բավական մեծ տարան։ Վատիկանի զինանշանով նմանատիպ տարաներ են տեղադրված թանգարանի տարբեր սրահներում։ Բացի այդ, այցելուներին ջերմաչափում է սպասվում․ եթե մարմնի ջերմաստիճանը 37․5-ից բարձր լինի, մուտքը կարգելվի։
Արվեստի ստեղծագործությունների վատիկանյան հավաքածուների սրտում հնարավոր կլինի հայտնվել միայն տոմսերը նախապես առցանց ամրագրելու դեպքում. դրա համար 15-ական րոպե ժամանակային ընդմիջումներ են նախատեսված: Նրանցից յուրաքանչյուրը թույլ է տալիս 17-ական եվրոյով մի քանի հարյուր տոմս վաճառել։
Հետ չմնալով Լուվրից ու Էրմիտաժից. Ձիթողցյանների տունը համալրվեց աուդիոգիդ համակարգով
Ընդ որում՝ «հետկարանտինային» ռեժիմի գործունեության ընթացքում, որի վերջնժամկետն առայժմ անհայտ է, այցելուներից չի գանձվի ձևակերպման 4 եվրո միջնորդավճարը։ Բացի այդ, նրանք պարտավոր են կրել բժշկական դիմակներ և միմյանցից առնվազն մեկ մետր հեռավորություն պահպանել։
Ինչպես լրագրողներին պատմեց Յատտան՝ հունիսի առաջին շաբաթվա համար Վատիկանի Թանգարանները 24 ժամում հազար հատից մի փոքր ավել տոմս են վաճառել։ Դրանց քանակը, բնականաբար, մի քանի օրում պետք է աճի, իսկ ղեկավարության հետագա ծրագրում «անցումային» շրջանում օրական 7 հազար տոմսի մակարդակի հասնելն է։
Եթե հաշվի առնենք առավելագույն ցուցանիշը (օրական 40 հազար այցելու), որն ընդամենը մի տարի առաջ խուճապի և բողոքի ալիք էր բարձրացնում Վատիկանի զբոսավարների կողմից, դա բավական համեստ թիվ է։
Ցուցասրահների աշխատակիցներն ու էքսկուրսավարները խոստովանել են, որ Վատիկանի արվեստի գանձարանի համար կատարելապես հարմարավետ ցուցանիշն այն է, որ այցելուների թիվը չգերազանցի օրական 15 հազար այցելուն։
Մեկուսացման ընթացքում ռեստավրատորները որմնանկարների վերականգնում են կատարել Կոնստանտինի սրահում, որը Ռաֆայելի ստանցաների (Stanze di Raffaello` Ռաֆայելի սենյակներ) մասն է կազմում․ Արդարադատության և Բարեկամության այլակերպումները վարպետի վերջին աշխատանքն են, չափերով և մասշտաբով հսկայական որմնանկարներն ավարտել են նրա աշակերտներն ու ենթավարպետները։ Հնգամյա ռեստավրացայից հետո որմնանկարները կցուցադրվեն հանրությանը, սակայն սրահում մասնագետների աշխատանքը դեռ շարունակվում է։
«Փրփրուն» հաճույք և ոչ միայն. 10 միջոց ինքնամեկուսացումը լավ անցկացնելու համար
Վատիկանի թանգարանային համալիրի աշխատանքային գրաֆիկը նոր պայմաններում ավելի երկար կլինի։ Եթե նախկինում դրանք աշխատում էին ժամը 9։00-18։00-ը, ապա հիմա երկուշաբթիից հինգշաբթի օրերին հնարավոր կլինի այցելել ժամը 10։00-20։00-ը, իսկ ուրբաթ և շաբաթ օրերին՝ մինչև 22։00-ը։ Վերջին այցելուներին ներս կթողնեն փակվելուց երկու ժամ առաջ։
Առաջին մի քանի օրը Վատիկանի թանգարանները ստիպված կլինեն բավարարվել Հռոմից և Լացիո մայրաքաղաքային մարզից եկած այցելուներով։ Սակայն արդեն հունիսի 3-ից սկսած Իտալիայի իշխանությունները նախատեսում են չեղարկել մարզերի միջև երթևեկության սահմանափակումները։ Միաժամանակ Իտալիան կվերականգնի շենգենյան գոտու երկրների և Մեծ Բրիտանիայի հետ ազատ տեղաշարժի ռեժիմը՝ առանց Ապենինյան թերակղզում կարանտին անցնելու պարտավորության։
