ԵՐԵՎԱՆ, 30 մայիսի – Sputnik. Կապանի ծեծկռտուքի գործով մեղադրյալներ Խորեն Միրզոյանին և Լևոն Համբարձումյանին կալանավորել են։ Տեղեկությունը Sputnik Արմենիային հայտնեց փաստաբան Վարդուհի Էլբակյանը։
«Ծեծկռտուքի գործով նրանց մեղադրանքներ են առաջադրվել ՀՀ քրեական օրենսգրքի 131-րդ հոդվածի 2-րդ մասի 1-ին կետի հատկանիշներով` մի խումբ անձանց կողմից նախնական համաձայնությամբ անձի առևանգման համար»,–ասաց փաստաբանը։
Նրա խոսքով`դատարանը որոշումը կայացրել է երեկ՝ հիմքում դնելով գործի օպերատիվ քննչական իրավիճակը։
Նշենք, որ այսօր Երևանի ընդհանուր իրավասության դատարանը հրապարակելու է Լևոն Համբարձումյանի եղբոր՝ մյուս մեղադրյալ Բաբկեն Համբարձումյանի կալանքի հարցով որոշումը։
Ավելի վաղ դատարանը մերժել էր կալանավորել նույն գործով մեղադրյալ Մարատ Ստեփանյանին։
Հիշեցնենք, որ մայիսի 24-ին Կապանում մեծ թվով մարդիկ հավաքվել էին ոստիկանության դիմաց և պահանջում էին ազատ արձակել իրենց հարազատներին։ Նրանք ասում էին, որ դիմակավորված և զինված ոստիկանները լուսադեմին ձերբակալել են Քաջարանի համայնքապետի մերձավոր շրջապատից 4 անձի։ Ավելի ուշ ձերբակալվածներից մեկին ազատ արձակեցին, և պարզվեց, որ նա սխալմամբ է տարվել ոստիկանական բաժին։
Դրանից հետո ՀՀ քննչական կոմիտեն հաղորդագրություն տարածեց` հայտնելով, թե որն է եղել այդ անձանց ձերբակալելու պատճառը։
Ըստ ՔԿ–ի` 2020թ. ապրիլի 29-ին՝ ժամը 13:30-ի սահմաններում, Զանգեզուրի պղնձամոլիբդենային կոմբինատի աշխատակիցներ Բ․ Հ․-ն, նրա եղբայրը՝ Լ․ Հ․-ն, Խ․ Մ․-ն և Մ․ Ս․-ն, կոմբինատի ավտոկայանատեղիում բռնություն գործադրելով, առևանգել են Շ. Մ․-ին և Խ.Մ․-ի կողմից վարվող ավտոմեքենայով տեղափոխել «Աժդանակ» ՍՊԸ-ի տարածք, Ա․ Հ․-ի և Գ․ Մ․-ի հետ ծեծի ենթարկել նրան:
Կապանի ոստիկանությունում քաղաքացուն բռնության ենթարկելու դեպքով քննություն է սկսվել
Շուրջ կես ժամ ծեծելուց հետո Շ. Մ․-ին « Տոյոտա-Պրադո» մակնիշի ավտոմեքենայով տեղափոխել են Ագարակ բնակավայրում գտնվող, Ա․Պ․-ին պատկանող առանձնատուն, որտեղ կրկին ծեծել են նրան, ինչին միջամտել են Շ.Մ․-ի եղբայրը՝ Գ.Մ․-ն և Ա․Փ․-ն, ինչպես նաև ինքնությունները չպարզված անձինք, ինչի հետևանքով ծեծկռտուքը դադարել է: Քրեական գործի նախաքննության ընթացքում, Ա․Պ․-ի բնակության վայրում կատարված խուզարկությամբ հայտնաբերվել է առանձնապես խոշոր չափի «մարիխուանա» տեսակի թմրամիջոց։
2020թ․ մայիսի 24-ին Խ․ Մ-ն, Մ․ Ս-ն և Լ․ Հ-ն ձերբակալվել են` ՀՀ քրեական օրենսգրքի 131-րդ հոդվածի 2-րդ մասի 1-ին կետով, իսկ Ա․Պ-ն՝ ՀՀ քրեական օրենսգրքի 268-րդ հոդվածի 3-րդ մասով նախատեսված հանցագործություններ կատարելու կասկածանքով։
ՄԻՊ–ը դատախազություն կդիմի Կապանի բաժանմունքում քաղաքացուն բռնության ենթարկելու դեպքով
