ԵՐԵՎԱՆ, 25 մայիսի — Sputnik. Հայաստանի տնտեսագիտական համալսարանի ռեկտորի նախկին պաշտոնակատար Ռուբեն Հայրապետյանը Facebook սոցիալական ցանցի իր էջում գրառում է կատարել, որտեղ անդրադարձել է ՀՊՏՀ ռեկտորի պաշտոնը թողնելու իր որոշման շարժառիթներին և բացատրել, թե ինչու է կարծում, որ ԿԳՄՍ նախարար Արայիկ Հարությունյանը հովանավորչությամբ է զբաղվում։
Նշենք, որ Ռուբեն Հայրապետյանին մեղադրում էին դոկտորական ատենախոսությունում գրագողություն կատարելու մեջ, և նա 2019 թվականի օգոստոսին թողեց զբաղեցրած պաշտոնը:
Այդ ժամանակ Բարձրագույն որակավորման կոմիտեի նախագահ Սմբատ Գոգյանը հայտարարեց, որ գրագողության դեպքերը կանխարգելող մեխանիզմի անհրաժեշտություն կա, և Հայրապետյանի դեպքն այս մասով կարող է լավ օրինակ ծառայել։
Գոգյանը վստահ էր, որ Հայրապետյանն ու շատ-շատերը ժամանակին չեն էլ գիտակցել, թե ինչ են անում, խնդիրը համակարգային է։
«Դա առկա է բոլոր ասպիրանտների, հայցորդների մոտ: Նրանք գալիս են՝ չիմանալով ինչ է գիտությունը, գիտական աշխատանքը, հետևում են իրենց ղեկավարների ասածներին, որոնք կարող է ժամանակ էլ չունենան զբաղվելու և պարզապես ասեն՝ գնա ստեղից կարդա, էնտեղից կարդա, մի բան գրի, և այդպես շղթայապես գնում է»,-ասել էր նա:
Իրավիճակը փոխելու համար Բարձրագույն որակավորման կոմիտեն նախատեսում էր իր գործառույթներում կետեր ավելացնել, որպեսզի կարողանան կրթել ասպիրանտներին՝ նրանց տեղեկացնելով ակադեմիական գրագիտության մասին։
Խաչատրյան. «ՀՊՏՀ–ի ռեկտորի նախկին պաշտոնակատարի հրաժարականը հետևանք էր նրա կտրուկ քայլերի»
Մայիսի 14-ին հայտնի դարձավ, որ Գոգյանը հրաժարվել է ԲՈԿ նախագահի պաշտոնից։ Իսկ այս օրերին ակտիվ քննարկվում է, Սմբատ Գոգյանի այն հայտարարությանը, որ Հայաստանի պետական տնտեսագիտական համալսարանի ռեկտորի պաշտոնակատար Դիանա Գալոյանի դոկտորական աշխատանքում առկա են ակնհայտ թարգմանություններ և արտագրություններ, սակայն ռեկտորի պաշտոնակատարն առ այսօր զբաղեցնում է իր պաշտոնը, քանի որ վերջինին, ըստ էության, հովանավորում է ՀՀ կրթության, գիտության, մշակույթի և սպորտի նախարարի տեղակալ Գրիշա Թամրազյանը։
Վերոնշվածի հետ կապված, Ռուբեն Հայրապետյանը գրել է․ «Չէ, լո՞ւրջ: Այն, ինչ պնդում էի ամիսներ շարունակ, որ ամբողջական, խորքային հետազոտությունս չի կարելի նսեմացնել համակարգի օբյեկտիվ և ոչ էական խնդիրներին հղում կատարելով, միայն հիմա՞ պարզ դարձավ, երբ հերթը փոխնախարարի «մտերիմին» (հենց իր խոսքերով) հասավ: Իսկ առանց հասկանալու ու խնդիրը պատկերացնելու ավել-պակաս արտահայտություններով խոսելու և գործելու համար ոչ ոքից ներողություն խնդրելու կարիք այժմ չկա՞: Արժեքային համակա՞րգ է փոխվել, թե՞ ի սկզբանե կեղծ, չմտածված հայտարարություններ էին: Ես, իհարկե, դատից հետո կասեմ, թե որքան անհեթեթ էին այդ խոսքերն ու գործողությունները, բայց այսքանից հետո գոնե սխալն ընդունելու համարձակություն էլ չկա՞»։
Նրա խոսքով ՝խնդիրը բնավ ամիսներ ուշացած ու մրցույթից մի քանի օր առաջ հանրային ճնշմամբ պարտադրված հնարավոր հրաժարականը չէ, այլ մոտեցումների և գործողությունների տարբերությունը:
«Բա երբ հանրային պաշտոնյան իր «մտերիմի» նկատմամբ փաստացի տարբերվող բարենպաստ վերաբերմունք է ցուցաբերում, դա ի՞նչ է: Ես բազմիցս նշել եմ, որ դա համարում եմ ուղղակի հովանավորչություն»,-գրել է նա:
Դիմորդները կասեն՝ էս կորոնավիրուսը «լազաթ» տվեց. Փաշինյան
Նշենք, որ այսօր ԿԳՄՍ նախարար Արայիկ Հարությունյանը հայտարարել էր, որ եթե պարզվի, որ Գրիշա Թամրազյանը կատարել է հովանավորչություն, ապա նա պետք է ենթարկվի քրեական պատասխանատվության, իսկ հակառակ դեպքում Սմբատ Գոգյանը սուտ մատնության համար կարող է ենթարկվել պատասխանատվության։
Հայրապետյանը վերջում նախարարին հեգնել է, թե սպասում է իր խոսքերի հետ կապված սուտ մատնության վերաբերյալ հաղորդմանը:
