ԵՐԵՎԱՆ, 14 մայիսի – Sputnik. Սմբատ Գոգյանը Բարձրագույն որակավորման կոմիտեի (ԲՈԿ) նախագահի պաշտոնից հրաժարվել է երեք պատճառով։ Նա իր որոշման մասին գրել է Facebook–ի էջում։
«ԲՈԿ-ի նախագահի պաշտոնից ազատման որոշումս ունի երեք շերտ։ Կրթության և գիտության բարեփոխման իմ պատկերացումները չեն համընկել նախարարության ռազմավարության հետ, և ժամանակի ընթացքում այդ հակասությունները խորացել են։ Չնայած այդ տեսակետների տարբերությանը` աշխատել եմ խղճի թելադրանքով։ Համակարգում բարեփոխում անելու համար անհրաժեշտ էին օրենքի կողմից լիազորող նորմեր, որոնք ստանալ այդպես էլ չկարողացա։ Իսկ նախարարի կողմից ԱԺ ամբիոնից նոր օրենքով ԲՈԿ-ը փակելու հայտարարությունից հետո աշխատելը դարձավ անիմաստ։ Իմ գաղափարներն այլևս կյանքի կոչել չեմ կարող։ Գրագողերը սպասում են կառույցի փակվելուն»,– գրել է նա։
Գոգյանը հիշել է նաև 2019 թվականի օգոստոսին տված իր հարցազրույցներից մեկը, երբ ասել էր, որ եթե Հայաստանի պետական տնտեսագիտական համալսարանի ռեկտոր Ռուբեն Հայրապետյանը հրաժարականի դիմում չգրեր, ապա ինքը կգնար։
«Իմ խոսքը կոնկրետ Ռուբենի մասին չէր, այլ երևույթի։ Նրանից հետո նշանակված ռեկտորի ժամանակավոր պաշտոնակատարի դոկտորական աշխատանքում առկա են ակնհայտ թարգմանություններ և արտագրություններ, բայց համապատասխան կապերի և հովանավորչության միջոցով նա առ այսօր զբաղեցնում է իր պաշտոնը։ Իր պաշտոնավարումն արժեքային ընտրություն է՝ իմ և իր միջև»,– որպես պաշտոնից հրաժարվելու երկրորդ պատճառ` նշել է նա։
Ըստ Գոգյանի` պաշտոնից հրաժարվելը նաև երրորդ պատճառ ունի։
«Նշանակումից երեք ամիս անց կնոջս հետ պայմանավորվեցինք, որ եթե նա ասի, որ մեծամտացել կամ հղփացել եմ, ապա նույն օրն աշխատանքից ազատման դիմում կգրեմ։ Նա այդպիսի բան դեռ չի ասել, բայց իր կարծիքով ես սկսել եմ ավելի քիչ ուրախանալ։ Իսկապես, այս աշխատանքն ինձ սկսել է հաճույք չպատճառել, քանի որ հստակ գիտակցում եմ, որ աշխատանքիս արդյունավետությունը կտրուկ ընկել է»,– գրել է նա։
Գոգյանը շնորհակալություն է հայտնել ՀՀ վարչապետ Նիկոլ Փաշինյանին՝ այս պատասխանատու ժամանակաշրջանում այդպիսի պատասխանատու պաշտոն վստահելու համար։
Հիշեցնենք` Սմբատ Գոգյանը Բարձրագույն որակավորման կոմիտեի նախագահ էր նշանակվել 2018 թվականի հունիսին։
Նա Գիտությունների ազգային ակադեմիայի մաթեմատիկայի ինստիտուտի ավագ գիտաշխատող է։ ԲՈԿ նախագահի պաշտոնից հրաժարվել է այսօր` մայիսի 14–ին։
Կնոջ հանդեպ արտահայտությունները վիրավորական են, բայց ՄԻՊ-ը չի կարող պաշտպանել պաշտոնյային
