ԵՐԵՎԱՆ, 23 մայիսի - Sputnik. Հանրային տրանսպորտը հինգ օր է, ինչ գործում է, բայց արդեն իսկ պարետի որոշման բազմաթիվ խախտւմներ են հայտնաբերվել։ Կառավարության մամուլի կենտրոնում տեղի ունեցած ասուլիսի ժամանակ ՀՀ քաղաքաշինության, տեխնիկական և հրդեհային անվտանգության տեսչական մարմնի ղեկավարի տեղակալ Արտյուշ Գրիգորյանը տեղեկացրեց, որ եթե պարետի որոշման խախտումը թույլ է տվել հանրային տրանսպորտի վարորդը, ապա տուգանվում է տվյալ կազմակերպության ղեկավարը` 100-300 հազար դրամի չափով, իսկ եթե ուղևորը՝ տուգանվում է հենց ուղևորը` նվազագույնի աշխատավարձի տասնապատիկի չափով։ Եթե խախտումը թույլ է տվել տաքսի ծառայություն մատուցող անհատը, ապա տուգանվում է հենց վարորդը։
Գրիգորյանը տեղեկացրեց, որ հանրային տրանսպորտում ներգրավված են 3500 տրանսպորտային միջոց և 20-25 հազար տաքսի ծառայություններ մատուցող անհատ ձեռնարկատերեր և ֆիզիկական անձինք։ Քանի որ ուղևորահոսքը քիչ է, ուղևորափոխադրումներ իրականացնողների համար աշխատանքը շահույթ չի ապահովում։
«Եթե տեմպը պահպանվի, միգուցե ժամանակավոր չվացուցակներ կազմվեն, որ և՛ ուղևորափոխադրող կազմակերպությունների համար շահավետ լինի, և հարմար՝ ուղևորների համար»,- նշեց Գրիգորյանը։
Նա տեղեկացրեց, որ տեսչական մարմինն ամենօրյա ռեժիմով շրջայցեր է կատարում՝ համոզվելու, որ պահպանվում են պարետի սահմանած անվտանգության կանոնները, մասնավորապես, տրանսպորտային միջոցներն ախտահանվում են օրական առնվազն երկու անգամ։ Նաև հորդորել են կազմակերպություններին՝ հանրային տրանսպորտի աշխատանքներում հնարավորինս չներգրավել վարակի ռիսկային խմբում գտնվող անձանց, հատկապես նրանց, ովքեր ունեն ուղեկցող խրոնիկական հիվանդություններ։
Ինչպես են դիմակներ արտադրում Տավուշի մարզում․ լուսանկարներ
Գրիգորյանի խոսքով՝ հսկողությունը խիստ է նաև տաքսի ծառայությունների նկատմամբ։ Այս հինգ օրերի ընթացքում 180 խախտման դեպք են արձանագրել՝ ուղևորները դիմակ չեն կրել կամ էլ վարորդի կողքին են նստած եղել։
Տեսչական մարմնի ղեկավարը շեշտում է՝ այս օրերին փորձել են հիմնականում բացատրական, իրազեկման աշխատանքներ տանել, իրենց նպատակը տուգանելը չէ. տուգանքը կանխարգելիչ գործունեության մի մասն է միայն։
ՀՀ ոստիկանության հասարակական կարգի ապահովման վարչության պետի տեղակալ Էդգար Պետրոսյանն էլ նշեց, որ իրենց իրականացրած ստուգումների ընթացքում ուղևորափոխադրում իրականացնող 81 սուբյեկտի նկատմամբ վարչական իրավախախտման արձանագրություն է կազմվել 34-ը տաքսի ավտոմեքենաների համար, 32-ը՝ երթուղային միկրոավտոբուսների, 15-ը՝ երթուղային ավտոբուսների և տրոլեյբուսների։ Մետրոպոլիտենում պարետի որոշման որևէ խախտում չի արձանագրվել։
Հիշեցնենք, որ ՀՀ կառավարությունը մայիսի 14–ի նիստում Հայաստանում արտակարգ դրությունը երկարարցրեց ևս մեկ ամսով։ Այն կտևի մինչև հունիսի 13–ը, ժամը 17։00–ը ներառյալ։ Բայց տնտեսական գործունեության շատ տեսակներ թույլատրելի է` որոշակի կանոնների պահպանմամբ։ Մայիսի 18-ից թույլատրվել է նաև հանրային տրանսպորտի գործունեությունը, սակայն հատուկ ռեժիմով։
Մասնավորապես, տրանսպորտային միջոցում պարտադիր պետք է գտնվել դիմակով: Արգելվում է նաև վերգետնյա տրանսպորտում կանգնած ուղևորներ տեղափոխելը՝ բացառությամբ տրոլեյբուսների։
Կանոնների խախտման դեպքում ոստիկանները կարող են կանգնեցնել հանրային տրանսպորտի միջոցը, իջեցնել ուղևորներին և մեքենան տեղափոխել տուգանային հրապարակ, որտեղ տուգանքի կենթարկվի վարորդը և/կամ ուղևորափոխադրող ընկերությունը:
Տրանսպորտում ու փակ տարածքներում դիմակ չկրողները կտուգանվեն 10 000 դրամով
