Հովակին Զաքարյանի դիտարկմամբ` խնդիրն այն է, թե որքան կպահպանվեն համաճարակի տարածման տեմպերը։ Ըստ նրա` եթե նման իրավիճակը շարունակվի ևս մեկ ամիս, ապա հեշտ կլինի հաշվել, թե որքան մարդ կվարակվի նշված ժամանակահատվածում։
«Ամեն դեպքում, հույս ունեմ, որ այս տեմպը` օրական արդեն 350–ի հասնող քանակը, շատ չի ավելանա, հետո կսկսի նվազել, հակառակ դեպքում լուրջ խնդիրներ կառաջանան առողջապահական ամբողջ համակարգում, որովհետև հիվանդանոցային տեղերն ու համապատասխան սարքերը սահմանափակ են, և կարող ենք հասնել մի վիճակի, երբ ծանր դեպքերի համար անհրաժեշտ քանակի տեղեր չենք ունենա»,– ասում է նա։
Հովակին Զաքարյանի կարծիքով` մեծ հարց է, թե ինչպես է տան պայմաններում կազմակերպվելու վարակվածների բուժումը, ով է հետևելու։ Եթե առաջնային բուժհաստատությունների, պոլիկլինիկաների վրա է դրված լինելու պարտավորությունը, ապա վիրուսաբանը վստահ չէ, որ բոլոր պոլիկլինիկաների բուժաշխատողները պատրաստ են նման բան անել` թե՛ տեխնիկապես, թե՛ իրենց գիտելիքներով, քանի որ մեր պոլիկլինիկաներում կազմակերպվածության մակարդակը շատ ցածր է։
«Եթե մարդիկ սկսեն տան պայմաններում բուժվել, շատ հավանական է, որ առաջանան լուրջ խնդիրներ։ Իհարկե սա ամենավատ տարբերակն է, որ կարող է լինել մեզ համար։ Սա նոր վիրուս է, որի մասին աշխարհը գիտի ընդամենը 4-5 ամիս, հետևաբար տվյալ ժամանակահատվածը բավականին քիչ է, որպեսզի գիտնականները կարողանան ամբողջությամբ հետազոտել բոլոր ասպեկտները։ Իսկ առհասարակ հակամարմինները կմնան, թե ոչ, մենք կիմանանք մեկ տարի հետո»,– ասում է ԳԱԱ Մոլեկուլյար բիոլոգիայի գիտահետազոտական ինստիտուտի ավագ գիտաշխատողը։
Երևանի մանկապարտեզներից մեկի աշխատակիցը վարակվել է կորոնավիրուսով
Հովակիմ Զաքարյանի փոխանցմամբ` շատերը կարծում են, որ շոգ եղանակին համավարակը կնահանջի, որովհետև օդակաթիլային եղանակով տարածվող սուր շնչառական վիրուսները հիմնականում տարածվում են ցուրտ եղանակային պայմաններում։ Ըստ նրա` դեռ մեզ մոտ չի հաստատվել ամառային շոգ եղանակը, և գուցե այդ դեպքում համավարակը որոշ չափով կնահանջի։ Այդուհանդերձ վիրուսոլոգը դժվարանում է պատասխանել, թե նվազման տեմպերն ավելի շատ կախված կլինեն եղանակային պայմաններից, թե համավարակի տարածման դեմ իրականացվող կանխարգելիչ միջոցառումներից։
