ԵՐԵՎԱՆ, 17 մայիսի - Sputnik. ՀՀ առողջապահության նախարարի մամուլի խոսնակ Ալինա Նիկողոսյանն անդրադարձել է վերջին շրջանում անընդհատ շահարկվող մի թեմայի, ըստ որի՝ Հայաստանում հանգուցյալի հարազատներին առաջարկում են 100 000 դրամ, որպեսզի ինչ-որ թուղթ ստորագրեն, որ իրենց հարազատը մահացել է կորոնավիրուսի հետևանքով։
«Նման լուրեր տարածողների կարող եք գտնել առողջապահության նախարար Արսեն Թորոսյանի, ինչպես նաև նախարարության ֆեյսբուքյան մեկնաբանություններում։ Անհասկանալի այս լուրերի հետևից փորձել ենք գնալ, սակայն գրառումներ կատարողներից որևէ արձագանք չենք ստացել և չենք գտել սկզբնաղբյուրը։ Գրառումների մեծ մասն արվում են հիմնականում ֆեյք էջերից՝ օրինակը սքրինշոթում։ Այս անհեթեթ լուրերը չեն համապատասխանում իրականությանը: Անհասկանալի է նաև, թե ո՞րն է պետության շարժառիթը՝ չհիմնավորված մահեր ունենալու և վիճակագրությունն «ուռճացնելու»»,- գրել է նա։
Նիկողոսյանն ընդգծել է, որ անձի մահը գրանցելու պահից մինչև դին հարազատներին հանձնելու գործընթացը վերահսկվում է նախարարության կողմից։
Նրա խոսքով՝ որոշ խմբեր օգտվում են իրավիճակից և առիթը բաց չեն թողնում վարկաբեկելու առողջապահության նախարարության աշխատանքը։
«Այնուամենայնիվ, եթե կան մարդիկ, ովքեր դեռ պնդում են, որ այդ երևույթը կա մեզանում, խնդրում ենք անհապաղ ներկայացնել ապացույցներ»,- եզրափակել է Նիկողոսյանը։
Նշենք, որ այս թեման վերջին շրջանում նոր թափ է հավաքել և մարդիկ չգիտեն ում հավատալ, քանի որ սոցցանցային օգտատերեից շատերը՝ նաև կեղծ էջերից, նման գրառումներ են կատարում։
Հիշեցնենք, որ մայիս 17-ի, ժամը 11:00-ի դրությամբ Հայաստանում գրանցվել է կորոնավիրուսի 4472 դեպք: Նրանցից փաստացի բուժում են ստանում 2463-ը, կատարվել է 40230 թեստավորում, առողջացել են վարակվածներից 1925–ը։ Ընդհանուր առմամբ գրանցվել է կորոնավիրուսային հիվանդությունից մահանալու 60 դեպք (երեկվա համեմատ ավելացել է 5-ով) և մահվան 24 անուղղակի դեպք:
