ԵՐԵՎԱՆ, 13 մայիսի — Sputnik. ՀՀ վարչապետ Նիկոլ Փաշինյանն այսօր հանդիպեց արդեն երեք օր ԿԲ–ի մոտ բողոքի ակցիա անող քաղաքացիների հետ։ Վարչապետը հիշեցրեց, որ արտակարգ դրության ռեժիմում նման ակցիաներ անել չի թույլատրվում։
«Հիմա բոլորդ հավաքվել եք ու առանց դիմակի եք, բա որ Աստված չանի, վարակվեք, ի՞նչ է լինելու։ Բոլորդ ձեր ընտանիքների անդամներին եք վարակելու»,–ասաց նա։
Ի պատասխան մասնակիցները հարցրին` արտակարգ դրության ռեժիմում բանկերն իրավունք ունե՞ն զանգել ու փող ուզել, ասել, թե` գալու են և քաղաքացու մեքենան տանեն։
Փաշինյանը նշեց, որ բանկերը 500 000 մարդու վարկային արձակուրդ են տրամադրել, եթե բանկի հետ հարաբերությունները նորմալ են եղել։ Բողոքի ակցիայի մասնակիցներն էլ պնդեցին՝ իրենք որևէ տույժ–տուգանք չունեն, սակայն վարկային արձակուրդ չեն ստացել։
ՓՄՁ–ներին տրամադրվող աջակցության պայմաններն ընդլայնվել են. ովքե՞ր կարող են օգտվել ծրագրից
Վարչապետն էլ պահանջեց 5 այդպիսի օրինակ իրեն տրամադրել` խոստանալով անձամբ ուսումնասիրել խնդիրը։
«Որ ծանոթանաք, ուղղակի կզարմանաք»,–արձագանքեց ակցիայի մասնակիցներից մեկը։
Վարչապետը հորդորեց գոնե դիմակ կրել` ասելով, որ չի բացառվում` առաջիկայում դիմակ կրելը պարտադիր դառնա։
Վերակառուցման և զարգացման բանկը Հայաստանին 13.4 մլն եվրոյի վարկ կտրամադրի, կշահեն մարզերը
Հիշեցնենք, որ ԿԲ-ի դիմաց արդեն երրորդ օրն է մի խումբ քաղաքացիներ բողոքի ակցիա են անցկացնում։ Նրանք բողոքում են բարձր տոկոսադրույքների դեմ և պահանջում են լիցենզիայից զրկել վարկային կազմակերպություններին։ Քաղաքացիներն այսօր ԿԲ նախագահին ուղղված դիմում հանձնեցին։
Նշենք, որ վարչապետ Նիկոլ Փաշինյանը շարունակում է շրջել Երևանում։
