ԵՐԵՎԱՆ, 11 մայիսի — Sputnik. ԱԺ «Իմ քայլը» խմբակցության ղեկավար Լիլիթ Մակունցն այսօր խորհրդարանի ամբիոնից իր ելույթի ընթացքում անդրադարձավ մայիսի 8-ի նիստում տեղի ունեցած միջադեպին՝ հիշեցնելով, որ դրան նախորդել են ընդդիմադիրների սադրիչ գործողություններն ու հայտարարությունները:
«Ես ուզում եմ ձեզ հիշեցնել, թե ով էր այն ընդդիմադիր պատգամավորը, որ 2018 թ.-ին ՀՀ վարչապետի երդմնակալության արարողությունից ընդամենը երկու օր անց ԱԺ-ում կոնֆլիկտ հրահրեց «Բարգավաճ Հայաստան» խմբակցության հետ: Էդմոն Մարուքյան: Ո՞վ էր այն պատգամավորը, որ 2 շաբաթ առաջ այստեղ կանգնած ԱԺ պատգամավոր Գևորգ Պապոյանին անընդհատ ընդհատում էր և ի վերջո հնչեցրեց սպառնալիք. «Ձայնդ կտրիր, թե չէ քթիցդ արյուն է գալու»: Էդմոն Մարուքյանը»,- ասաց Մակունցը:
Նա նաև նշեց, որ Մարուքյանն ընդհատել է Ռուբեն Ռուբինյանի վարման կարգով ելույթը՝ իր տեղից վեր կենալով ու իջնելով ներքև և կոնֆլիկտ հրահրելով: Մակունցը նաև փաստեց, որ պատգամավոր Սուրեն Գրիգորյանին Մարուքյանը դիմել է` ով ես դու, արա, Ալեն Սիմոնյանին՝ սեռական բնույթի հայհոյանքով, իսկ հանձնաժողովի նիստի ժամանակ հայտարարել. «Հեսա քֆուր կտամ»:
ԱԺ-ը շարունակում է աշխատանքն առանց «Լուսավոր Հայաստանի»
Անդրադառնալով մայիսի 8-ի միջադեպին՝ Մակունցը նշեց, որ ծեծկռտուքի ժամանակ, երբ Մարուքյանին ապտակելուց հետո պատգամավորները Սասուն Միքայելյանին պահել էին, որ չխփի նրան, Մարուքյանը հարձակվել էր ու ոտքով հարվածել Միքայելյանին:
«Լուսավոր Հայաստանը զոհ չէ, ինչպես իրենք փորձում են պնդել պարբերաբար: «Լուսավոր Հայաստան» խմբակցությունը` ի դեմս նաև իր ղեկավար Էդմոն Մարուքյանի, կոնֆլիկտի կողմ է, ավելին՝ կոնֆլիկտը հրահրող կողմ է»,- հայտարարեց Մակունցը:
«Իմ քայլի» ղեկավարն անդրադարձավ իրենից առաջ ելույթ ունեցած Սասուն Միքայելյանի առաջարկին ու նաև լրացրեց այն:
«Այո, Սասուն Միքայելյանը պատրաստ է մանդատը վայր դնել՝ պայմանով, որ մանդատը վայր կդնի նաև Էդմոն Մարուքյանը: Ավելին՝ իրենց մանդատները վայր կդնեն նաև Արտակ Մանուկյանն ու Վահե Ղալումյանը՝ պայմանով, որ միաժամանակ մանդատները վայր են դնում նաև «Լուսավոր Հայաստան» խմբակցության անդամներ Հրանտ Այվազյանն ու Սարգիս Ալեքսանյանը»,- ասաց Մակունցը՝ հավելելով, որ սպասում են իրենց առաջարկների` «Լուսավոր Հայաստանի» պատասխանին:
Նշենք, որ մինչ այդ պատգամավոր Սասուն Միքայելյանն ԱԺ ամբիոնից Էդմոն Մարուքյանին առաջարկել էր ներողություն խնդրել Ալեն Սիմոնյանից, իսկ եթե մանդատը վայր դնելու հարց է բարձրացվում, ապա ինքը պատրաստ է մանդատից հրաժարվել՝ պայմանով, որ Մարուքյանը ևս վայր կդնի իր մանդատը:
Ի՞նչ էր անում Նիկոլ Փաշինյանը, երբ ԱԺ-ում պատգամավորներն իրար էին ծեծում․ տեսանյութ
Հիշեցնենք, որ մայիսի 8-ի ԱԺ նիստի ժամանակ ծեծկռտուք էր տեղի ունեցել «Լուսավոր Հայաստան» խմբակցության ղեկավար Էդմոն Մարուքյանի և «Իմ քայլի» պատգամավոր Սասուն Միքայելյանի միջև։ Վեճին խառնվել են նաև դահլիճում գտնվող կառավարության անդամներն ու փոխվարչապետ Տիգրան Ավինյանը: Փաշինյանը դեպքից ժամեր անց հանդես էր եկել հայտարարությամբ` ասելով, որ տեղի ունեցածը սադրանք է։
