ԵՐԵՎԱՆ, 8 մայիսի – Sputnik. ՀՀ վարչապետ Նիկոլ Փաշինյանը կարծում է, որ կորոնավիրուսի հետևանքով տուժել է միջազգային համագործակցությունը, որովհետև ոչ ոք պատրաստ չէր այս իրավիճակին։
«Հիմա կարևոր է վերականգնել միջազգային համագործակցության մթնոլորտը, քանի որ համավարակի պատճառով կա բացասական էֆեկտ։ Միջազգային համագործակցությունը փոխվել է, և մենք չունենք մեր գործընկերների հետ նախկին շփումները։ Մենք պետք է աշխատենք վերականգնել դա»,– «Միր» հեռուստաընկերությանը տված հարցազրույցում ասաց նա։
Փաշինյանը նշեց, որ մինչ կորոնավիրուսը Հայաստանը տնտեսական լավ ցուցանիշներ ուներ, բայց կորոնավիրուսը հարվածեց տնտեսությանը։
«Այժմ մենք աշխատում ենք հակաճգնաժամային միջոցառումների ուղղությամբ։ Ավելի քան միլիոն մարդ արդեն աջակցություն է ստացել կառավարությունից։ Կարծում եմ` դեռ կարողանում ենք հաղթահարել ճգնաժամը։ Իհարկե, Հայաստանում կա լարվածություն, բայց սոցիալական ճգնաժամ դեռ չկա։ Իմ հաշվարկով` մենք դեռ մեկ տարի էլ կապրենք համավարակի պայմաններում։ Ակնհայտ է, որ համաշխարհային տնտեսությունն է ռեցեսիոն փուլում հայտնվել։ Կարևոր է, որ մարդասիրական ճգնաժամ չլինի»,– նշեց նա։
Ինչ վերաբերում է Հայրենական մեծ պատերազմում տարած հաղթանակի 75-ամյակին, ապա, ըստ Փաշինյանի, Հայաստանում վաղը` մայիսի 9-ին, օրը կնշվի հատուկ պայմաններում` 208 վետերաններին մեծարելու միջոցառումներ կանցկացվեն, ինչպես նաև ավիաշքերթ կկազմակերպվի։
Հաղորդավարը հետաքրքրվեց նաև Փաշինյանի պապով, որը մասնակցել է պատերազմին։
«Պապիս մասին ոչինչ չեմ հիշում, նույնիսկ հայրս չի հիշում նրան, որովհետև մեկ տարեկան է եղել, երբ պապս գնացել է պատերազմ»,– ասաց Փաշինյանը` նշելով, որ նրանից մնացել են մի քանի խունացած լուսանկարները։
Ըստ վարչապետի` իրենք նույնիսկ չգիտեն, թե ինչպես է պապը մահացել։ Մի փաստաթղթերով մահացել է 1943 թվականն, մյուս փաստաթղթերով` անհետ կորել է։
«Ինձ բախտ չի վիճակվել շփվել նրա հետ, բայց ես հպարտ եմ, որ կրում եմ նրա անունը»,– ասաց Փաշինյանը։
ՀՀ վարչապետը նշեց նաև, որ մեր երիտասարդությունն ամեն օր է շփվում այդ պատերազմի հերոսների հետ, որովհետև Երևանի գլխավոր պողոտաներից մեկը կոչվում է մարշալ Բաղրամյանի անունով, մյուսը` մարշալ Բաբաջանյանի, երրորդը` ադմիրալ Իսակովի։ Երկրում բազմաթիվ հուշարձաններ կան նրանց պատվին։
Փաշինյանը խոսեց նաև Ռուսաստանի մասին` նշելով, որ ՌԴ–ն Հայաստանի թիվ մեկ գործընկերն է, տարածաշրջանի անվտանգության գլխավոր երաշխավորը։
«Ես ուրախ եմ, որ մեզ հաջողվում է զարգացնել հարաբերությունները բոլոր հարթություններում։ Համոզված եմ, որ մեր համագործակցությունը կշարունակի աճել»,– ասաց նա։
Ինչ վերաբերում է ԵԱՏՄ–ին, ապա ՀՀ վարչապետը հիշեցրեց, որ այդ կառույցն առանց մաքսատուրքի ապրանք արտահանելու միջոց է, ինչը կարևոր գործոն է Հայաստանի համար։ Երկրի գլխավոր նպատակն է հարաբերությունները զարգացնել բոլոր անդամ երկրների հետ։
Նա խոսեց նաև վարչապետի աշխատանքի բարդությունների մասին։
«Վարչապետի աշխատանքում անկանխատեսելիություն շատ կա, ինչպես ցույց տվեց կորոնավիրուսը։ Պետք է պատրաստ լինես ամեն ինչի։ Պետք է պատրաստ լինես աշխատել 24 ժամ, որովհետև կարող է գիշերվա ուշ ժամին կարևոր զանգ հնչել»,– նշեց նա։
Փաշինյանի խոսքով` վարչապետը պետք է կարողանա հանգստանալ աշխատանքի ժամանակ։
