ԵՐԵՎԱՆ, 6 մայիսի - Sputnik. Ռուսաստանաբնակ հայտնի դիմահարդար, ոճաբան Գոհար Ավետիսյանը Instagram-ի իր էջում նոր լուսանկար է հրապարակել և հետևորդներին ցույց տվել գեղեցիկ կարգավիճակը։ Դիմահարդարը հետևորդներից հարցուփորձ է արել, թե ինչպես են վերաբերվում նորածինների համար նախապես գնումներ կատարելուն։
«Հարց բոլոր մայրիկներին` դուք նախապե՞ս եք երեխայի օրորոցն ու հագուստը գնել, թե՞ հետևել ենք այն կարգախոսին, որ նախ ծննդաբերել է պետք։ Շատերն են ասում, որ երեխայի համար նախապես գնումներ կատարելը լավ նշան չէ, բայց ախր գնումներ կատարելու տեղ էլ չկա, ամեն ինչ փակ է։ Ամբողջ կյանքս երազել եմ այս ժամանակահատվածի մասին, պատկերացնում էի, թե ինչպես եմ վազվզելու խանութներով, որպեսզի գնեմ այն ամենն, ինչ անհրաժեշտ է։ Իսկ այժմ միակ տարբերակը մնում է առցանց գնումներ կատարելը, չնայած որ ընդհանրապես չեմ սիրում այդ պրոցեսը»,- գրել է նա։
Էջի հետևորդները Գոհարին խնդրել են չնեղսրտել, հավատացնելով, որ կորոնավիրուսն էլ է ժամանակավոր, կարևորն այժմ ապագա երեխաների և սեփական առողջության մասին մտածելն է, իսկ գնումներ հետո էլ կանի։
«Մի վհատվիր, առցանց գնումներ կատարելն այդքան էլ ձանձրալի չէ, հատկապես, երբ կարելի է գտնել այնպիսի հագուստ, որ խանութներում չկա, կամ դժվար է հանդիպում», «հրաշալի տեսք ունես», «առժմ ամենակարևորը առողջության մասին մտածելն է»,- գրել են նրանք։
Նշենք, որ առաջին ամուսնուց՝ գործարար Վաղինակ Մարտիրոսյանից բաժանվելուց հետո Ավետիսյանը գրեթե կես տարի ընկճախտի մեջ էր։ Նրանք միասին ապրեցին երկու տարի, բայց միմյանց ճանաչում էին հինգ տարի։ Մինչև ամուսնությունը պարզապես ընկերներ էին, շփվում էին։ Մի անգամ Ավետիսյանը խոստովանել է, որ իր և Վաղինակի միջև կայծը բռնկվել է հարսանիքից ընդամենը մեկ ամիս առաջ։ Սակայն նրանց համատեղ կյանքը երկար չտևեց․ երկուսն էլ որոշեցին բաժանվել։ Ամուսնալուծությունից հետո դիմահարդարը 43 կգ-ով նիհարեց և նոր սեր գտավ։
Նրա երկրորդ ամուսինը հանրային դեմք չէ։ Երկրպագուները հաճախ են նրանց միասին լուսանկարում։ Ըստ որոշ աղբյուրների՝ մինչ Գոհարի հետ ամուսնանալը տաքսու վարորդ է աշխատել։ Սոցիալական ցանցերում գրանցված չէ։
Հիշեցնենք, որ Գոհարը գտնվում է հղիության երրորդ եռամսյակում։ Նա զույգ տղա է լույս աշխարհ բերելու։
Գոհարը ծնունդով ՀՀ Մարտունիից է, նրա ընտանիքը Մոսկվա է տեղափոխվել, երբ աղջիկն ընդամենը մեկ տարեկան էր։ Նա հավասարապես սիրում է թե Մոսկվան, թե Հայաստանը։ Գոհարը, դիմահարդարման իր վարպետությամբ, բառացիորեն գրավել է Մոսկվան։ Կոսմետիկ նյութերով սկսել է աշխատել դեռ 11-12 տարեկանում։
16 տարեկանում ընդունվել է Ռուսաստանի ժողովրդական տնտեսության և պետծառայության ակադեմիա՝ տնտեսագիտության ֆակուլտետ։ Դեռ առաջին կուրսում սկսել է դիմահարդարել բոլոր ընկերուհիներին և ծանոթներին։
«Գրողը տանի, ախր նոր–նոր էի նիհարել». Գոհար Ավետիսյանը խոսել է հղիության մասին
Սիրելի զբաղմունքը դարձել է աշխատանք, նա ստիպված է եղել թողնել ուսումը։ Արդյունքում՝ 2012թ-ին, Գոհարը սկսել է դասավանդել։ Սկզբում դիմահարդարման վարպետության դասընթացներ էր անցկացնում, իսկ հիմա արդեն իր դպրոցն ու ստուդիան ունի Մոսկվայի կենտրոնում։
