ԵՐԵՎԱՆ, 4 մայիսի – Sputnik. ՀՀ քննչական կոմիտեն ավարտել է «էրեբունի Պլազա» բիզնես կենտրոնում անձանց պատանդ վերցնելու և կրակոցներ արձակելու գործով նախաքննությունը: Գործն ուղարկվել է դատարան՝ պատանդառուի նկատմամբ բժշկական բնույթի հարկադրանքի միջոց կիրառելու եզրակացությամբ:
Ինչպես հայտնում է ՀՀ դատախազությունը, նախաքննությամբ պարզվել է, որ քաղաքացի Արթուր Թորոսյանը, հանդիսանալով «Հայաստանի որսորդների և ձկնորսների միավորում» ՀԿ–ի անդամ, 2020թ. հունվարի 8-ին ձեռք է բերել «Սայգա» տեսակի հրազեն և փամփուշտներ:
Իսկ հունվարի 23-ին, 14:30-ի սահմանում զենքով մտել է Երևանի Վազգեն Սարգսյան փողոցում գտնվող «Էրեբունի պլազա» բիզնես կենտրոն, կրակել առաստաղին, ապա անձանց կյանքի և առողջության համար վտանգավոր բռնություն գործադրելով` զենքի փողն ուղղել է ընդունարանի աշխատակցուհու կողմը և պահանջել իրեն ուղեկցել ՀՀ երկրորդ նախագահ Ռոբերտ Քոչարյանի գրասենյակ: Աշխատակցուհին հայտնել է, որ Քոչարյանի գրասենյակը փակ է, զինված տղամարդը բոլորին կրակելու սպառնալիքներով շարժվել է դեպի բիզնես կենտրոնի մարզասրահ և, զենքի փողն ուղղելով անվտանգության աշխատակիցներից մեկի ուղղությամբ, պահանջել է իրեն ուղեկցել Քոչարյանի գրասենյակ:
Երևանում հոր և որդու վրա կրակոցներ արձակելու կասկածանքով 23-ամյա երիտասարդ է ձերբակալվել
Երբ շենքի աշխատակիցը տեղեկացրել է, որ տվյալ ուղղությամբ միայն մարզասրահն ու վարսավիրանոցն են, վերադարձել է ընդունարան, ևս մեկ կրակոց արձակել այդտեղ գտնվող բազմոցի և սյան ուղղությամբ՝ վնասելով գույքը:
Ապա զենքի փողն ուղղել է մեկ անձի կրծքավանդակին՝ հայտնելով, որ վերջինս պատանդի կարգավիճակում է և պահանջել իր մոտ կանչել Քոչարյանի գրասենյակի ղեկավար Վիկտոր Սողոմոնյանին: Բացի այդ, նա հայտնել է, որ պատանդին կազատի միայն իր պահանջը կատարելուց հետո, երբ կհանդիպի ու պատանդ կվերցնի Վ. Սողոմոնյանին ու կներկայացնի նոր՝ Ռոբերտ Քոչարյանի որդուն՝ Սեդրակ Քոչարյանին հանդիպելու պահանջ:
2020թ. հունվարի 25-ին Ա.Թ.-ին մեղադրանք է առաջադրվել, դատարանի որոշմամբ նրա նկատմամբ խափանման միջոց է կիրառվել կալանավորումը:
Իսկ արդեն նախաքննության ընթացքում իրականացված դատահոգեբուժական և դատահոգեբանական փորձաքննությունների արդյունքում պարզվել է, որ Ա. Թ.-ն տառապում է «շիզոֆրենիա, պարանոիդ ձև» հոգեկան հիվանդությամբ, իսկ հանցավոր արարքը կատարելիս գտնվել է հիվանդագին խանգարված վիճակում: Ա. Թ.-ին ճանաչվել է անմեղսունակ և անհրաժեշտ է համարվել նրան հոգեբուժական բաժանմունքի պայմաններում հարկադիր բուժման ենթարկել:
2020թ. մարտի 21-ին դատարանի որոշմամբ Ա. Թ.-ն տեղավորվել է հոգեբուժական հիվանդանոցում, ինչից ելնելով` նրա նկատմամբ ընտրված խափանման միջոց կալանավորումը վերացվել է:
Մեղադրյալի նկատմամբ բժշկական բնույթի հարկադրական միջոցներ կիրառելու նախաքննական մարմնի որոշումը և քրեական գործն ուղարկել է Երևան քաղաքի ընդհանուր իրավասության դատարան: Նրա նկատմամբ հետագա բուժման հարցը կորոշվի արդեն դատաքննության արդյունքում:
Կրակոց Երևանում. Սարի թաղից հիվանդանոց են տեղափոխել քրեական աշխարհում ճանաչված երիտասարդի
