ԵՐԵՎԱՆ, 30 ապրիլի – Sputnik. ՀՀ կառավարությունն այսօրվա նիստում հաստատեց COVID-19 նոր կորոնավիրուսի հետևանքով ստեղծված տնտեսական և սոցիալական հետևանքների մեղմման ուղղված հերթական՝ 15-րդ ծրագիրը:
Ծրագրի հեղինակը Շրջակա միջավայրի նախարարությունն է, որն առաջարկում է ՀՀ բարձրադիր գոտիներում հիմնել գետերի ափապաշտպան անտառաշերտեր՝ ուռենու տեղական տեսակներից:
«Կորոնավիրուսի տնտեսական հետևանքների չեզոքացման տանհինգերորդ միջոցառման նպատակն է կորոնավիրուսի տարածման հետևանքով գոյացած դժվարությունների արդյունքում սոցիալական խնդիրների առջև կանգնած բնակչությանը ծառատնկման աշխատանքներ կատարելու դիմաց վճարի տրամադրումը»,- կառավարության նիստում հայտնեց նախարար Էրիկ Գրիգորյանը:
Ծրագիրը կիրականացնեն 3 կազմակերպություններ՝ «Հայանտառ» ՊՈԱԿ-ը, «Վայրի բնության և մշակութային արժեքների պահպանման հիմնադրամը» և «Էյ Թի Փի» բարեգործական հիմնադրամը։
Աշխատանքների իրականացման ընդհանուր արժեքը շուրջ 200 մլն դրամ է: Ծրագրի շահառու ուրաքանչյուր քաղաքացու կտրամադրվի 50 դրամ՝ յուրաքանչյուր կտրոնի պատրաստման և տնկման համար։
Վարչապետ Նիկոլ Փաշինյանը հավելեց, որ նախատեսվում է շուրջ 1000 քաղաքացու մասնակցություն, բայց ծառատունկը նախատեսվում է հետագայում վերածել մշտական եզոնային ծրագրի:
Աշխատանքի և սոցիալական հարցերի նախարար Զարուհի Բաթոյանն էլ հայտնեց, որ անապահով ընտանիքներն այդ աշխատանքներին մասնակցելու արդյունքում նպաստից չեն զրկվի:
