ԵՐԵՎԱՆ, 30 ապրիլի — Sputnik. ՀՀ վարչապետ Նիկոլ Փաշինյանը կոչ է անում նրանց, ովքեր օգնության կարիք չունեն, սակայն փոխհատուցում են ստացել կառավարությունից, այդ գումարը կա՛մ փոխանցեն կորոնավիրուսի կանխարգելման հիմնադրամին, կա՛մ էլ վճարեն նրանց կոմունալները, որոնք ունեն դրա կարիքը։ Փաշինյանը տնից նման հայտարարությամբ հանդես եկավ Facebook սոցցանցի ուղիղ եթերում։
«Մարդ կա`իր նշանի մատանին վաճառել է ու հոսանքի պարտքը փակել, իսկ հարևանը նշանի մատանի էլ չունի, որ ծախի։ Մյուս կողմից, կան մարդիկ, որ կարիք չունեն փոխհատուցման, սակայն ուզած–չուզած կոմունալների համար ստանալու են փոխհատուցում։ Ձեր բակում, շենքում, բարեկամների մեջ ով ունի կարիք, այդ գումարը նրանց տվեք, որ կոմունալները վճարեն»,–ասաց Փաշինյանը` հավելելով, թե այդպիսով կառավարությանն օգնած կլինեն։
Նա վերջում նշեց, թե` տեսա՞ք, այս հարցի լուծումն էլ գտանք, թե չէ ասում էին` լույսերն անջատել են։ Վարչապետը խոստովանեց` շատ է ուրախանում, որ ինչ-որ հարցի լուծում է գտնում։
Հիշեցնենք, որ Փաշինյանն այսօր հայտարարել էր, որ եթե կառավարությունը մինչ այս աջակցում էր մինչև 10 000 դրամ էլեկտրաէներգիայի սպառում ունեցողներին, սակայն հիմա կաջակցեն նաև նրանց, ովքեր փետրվարին 10 001–25 000 դրամի էլեկտրաէներգիա և 30 001–40 000 դրամի գազ են սպառել։ Այդպիսով` 207 837 էլեկտրաէներգիայի, իսկ 81 697 գազի բաժանորդներ փոխհատուցում կստանան։
Պետք է ոչ թե հորդորել կոմունալ վճարումներ անել, այլ գումարը բաշխել ամիսների միջև. Պիպոյան
Ավելին, 50 տոկոս փոխհատուցում կտրամադրեն նաև մարտին մինչև 3000 դրամի ջուր սպառած բաժանորդներին. 424 972 բաժանորդ կօգտվի այս աջակցությունից։
Կոմունալների հատուցման գումարը կարելի է փոխանցել կորոնավիրուսի կանխարգելման հաշվեհամարին
Իսկ չգազաֆիկացված 310 գյուղերի բնակիչների փետրվարյան էլեկտրաէներգիայի ծախսը կփոխհատուցվի 50, ընդհուպ մինչև 70 տոկոսով։ Այսպիսով, ըստ Փաշինյանի, կոմունալ ճգնաժամի հարցը փակում են, քանի որ 4-5 մլրդ դրամ են ծախսում քաղաքացիների կոմունալ վարձավճարների փոխհատուցման համար։
