Գեղարքունիքի մարզի Գավառ քաղաքում տեղի ունեցած աղմկահարույց սպանությունների կադրերի չմոնտաժված տարբերակը հրապարակել է shasmhyan.com–ը։
Ապրիլի 28-ին հայտնի դարձավ, որ Գավառում հնչած կրակոցների հետևանքով 2 մարդ է մահացել, իսկ 6–ին տեղափոխել են քաղաքի հիվանդանոց։ Ավելի ուշ տեղեկություն տարածվեց, որ մի խումբ մարդիկ ներխուժել են բուժկենտրոն ու փորձել են սպանել տուժածներից երկուսին։ Նշվում էր նաև, որ այդ ժամանակ հիվանդանոցում ոչ միայն ոստիկաններ են եղել, այլ նաև ՀՀ ոստիկանապետ Արման Սարգսյանը։ Այսօր, սակայն, ոստիկանության լրատվության և հասարակայնության հետ կապերի վարչության պետ Աշոտ Ահարոնյանը հայտարարեց, որ ոստիկանապետը տեղում չի եղել, իսկ հիվանդանոցում որևէ մեկին չեն սպանել։
Քննչական կոմիտեում դեպքի առթիվ քրգործ է հարուցվել, արդեն 15 մարդ է ձերբակալվել։
«Հղի հարսիս վախեցրին, տղայիս տարան». նորատուսցիները չգիտեն` որտեղ են բերման ենթարկվածները
Ըստ ՔԿ–ի` ապրիլի 28-ին՝ ժամը 17:00-ի սահմաններում, Գավառի Ազատության փողոցում ենթադրյալ հանցագործություն կատարած անձը (անձինք) կրակահերթ են արձակել Նորատուս համայնքի բնակիչներ Վահե Ավետիսյանի, Հրաչյա Հակոբյանի, Արմեն Սարգսյանի, Արտյոմ Պետրոսյանի և Սասուն Մելոյանի, Գավառի բնակիչներ Զոհրաբ Պարոնիկյանի, Արմեն Հայթյանի և Վարդան Դավոյանի ուղղությամբ, ինչի հետևանքով ստացած կյանքի հետ անհամատեղելի վնասվածքներից Վ.Ավետիսյանը և Զ.Պարոնիկյանը տեղում մահացել էին, իսկ մյուսները՝ ստացած մարմնական վնասվածքներով, տեղափոխվել էին «Գավառ ԲԿ» ՓԲԸ: Դեպքից որոշ ժամանակ անց մի խումբ անձինք հարձակվել են Գավառի հիվանդանոցի վրա, կոտրել ապակիները և գույքը, հարվածներ հասցրել Դավիթ Հայթյանին՝ պատճառելով մարմնական տարբեր վնասվածքներ՝ ծակած-կտրած վերքեր և հեմատիկ շոկ՝ ծանր աստիճանի:
Նույն օրը՝ ժամեր անց, Զ.Պարոնիկյանի և Վ.Ավետիսյանի հարազատները և ընկերները, իմանալով, որ վերջիններս մահացել են, կարծելով, որ իրենց հարազատների սպանությունը կատարել են հիվանդանոցում գտնվող Ա.Հայթյանը, Դ.Հայթյանը և Վ.Դավոյանը, վերջիններիս սպանելու դիտավորությամբ, ներխուժել են հիվանդանոց, կտրող-ծակող գործիքներով հարձակվել և փորձել են սպանել նրանց, սակայն հանցագործությունն ավարտին չեն հասցրել։
