ԵՐԵՎԱՆ, 28 ապրիլի – Sputnik. Վրաստանն ու Հայաստանը պայմանավորվել են տրանսպորտային փոխադրումների ոլորտում նոր կարգավորումներ անել՝ քանի դեռ երկու երկրներում արտակարգ դրության ռեժիմ է գործում։
Ավելի վաղ ՀՀ Պետական եկամուտների կոմիտեն հայտնել էր, որ վրացական կողմի հետ ձեռք բերված պայմանավորվածության համաձայն` Ռուսաստանից Վրաստանի «Սադախլո» անցակետով Հայաստան եկող փոքր բեռնատարների համար արգելքը հանվել է։
«Խոսքը TIR-ից փոքր բեռնատար մեքենաների մասին է», - Sputnik Արմենիային հայտնեցին Վրաստանում Հայաստանի դեսպանատանը։
Փոքր չափի մեքենաներին թույլ է տրվում Վրաստանի տարածքով փոխադրումներ իրականացնել Հայաստանից Ռուսաստան և հակառակ ուղղությամբ։ Այդ խմբում ներառված են նաև փոստատար մեքենաները, որոնք փոխադրումներ են իրականացնում Թբիլիսիի միջազգային օդանավակայանից։
Փոքր չափերի մեքենաների վարորդները կարող են արդյունաբերական ապրանքներ տեղափոխել Վրաստանի տնտեսվարողներից (դա չի վերաբերում գյուղատնտեսական ապրանքներին,- խմբ.)։
Վարորդները պետք է սահմանին ներկայացնեն Վրաստանում իրենց գործընկերների հետ կնքված պայմանագրերը, նաև պետք է խստորեն հետևեն ներկայացրած երթուղուն ու ժամանակացույցին։
Նշենք՝ մարտի 13-ից ուղևորափոխադրումները Վրաստանի ու Հայաստանի միջև արգելվել են։ Բեռնափոխադրումներն իրականացվում են սովորական ռեժիմով։
Երկու երկրում էլ կորոնավիրուսային վարակի տարածումը կանխելու նպատակով արտակարգ դրության ռեժիմ է հայտարարվել։
ԵԱՏՄ տարածքում բեռնափոխադրումների նոր կարգեր են գործելու․ փոխնախարար
