ԵՐԵՎԱՆ, 23 ապրիլի — Sputnik. Բարձր առաջադիմությամբ որևէ ուսանող ուսման վարձի պատճառով բուհից դուրս չի մնա: Այսօր կառավարության նիստում հայտարարեց ՀՀ վարչապետ Նիկոլ Փաշինյանը:
Իսկ ՀՀ ԿԳՄՍ նախարար Արայիկ Հարությունյանը մանրամասն ներկայացրեց, թե որ ուսանողների ուսման վարձն ինչ չափով կփոխհատուցվի կառավարության կողմից:
«90 և ավել տոկոս ՄՈԳ ունեցող ավարտական կուրսերում սովորողների համար որոշել ենք, որ 2019-2020 թթ. ուսումնական տարվա 2-րդ կիսամյակի ուսման վարձը 100%-ով փոխհատուցվում է»,- ասաց նախարարը:
Ոչ ավարտական կուրսում սովորող բարձր առաջադիմություն ունեցող ուսանողների ուսման վարձը կառավարությունը կփոխհատուցի 70%-ով:
Եթե ուսման վարձն արդեն ամբողջությամբ կամ մասնակի վճարվել է ֆիզիկական անձանց կողմից, ապա այդ չափով այն վերադարձվում է վճարողին: Իսկ եթե վճարվել է իրավաբանական անձանց կողմից, այն կփոխանցվի բուհին:
Բարձր առաջադիմությամբ այն ուսանողների համար, որոնք ուսման վարձը կվճարեն ուսանողական վարկերով, կառավարությունը նախատեսում է վարկի մարման տոկոսադրույքների ամբողջական սուբսիդավորում՝ մինչև 2020թ-ի դեկտեմբերի 31-ը:
Իսկ մինչև 80% ՄՈԳ ունեցող ուսանողների վարկերի տոկոսադրույքները կսուբսիդավորվեն մասնակի: Ուսանողները ստիպված կլինեն դրանից 4%-ն ինքնուրույն վճարել:
Կառավարությունը թիրախային ճիշտ խումբ չի ընտրել. Ափոյանը` ուսանողներին առնչվող ծրագրի մասին
Կառավարությունն այսպիսով հաստատեց կորոնավիրուսի տնտեսական հետևանքների չեզոքացման տասնչորսերորդ միջոցառումը, որն ուղղված է ՀՀ պետական ու մասնավոր բուհերի ուսանողներին:
Բարձր առաջադիմություն ունեցող որևէ ուսանող բուհից դուրս չի մնալու վճարի պատճառով. Փաշինյան
