ԵՐԵՎԱՆ, 17 ապրիլի – Sputnik. ՀՀ երրորդ նախագահ Սերժ Սարգսյանին ԱԺ-ից հրավերը եղել է 2016 թվականի ապրիլին ծավալված ռազմական գործողությունների հանգամանքներն ուսումնասիրող քննիչ հանձնաժողովի կողմից, բայց մուտքը կազմակերպվել է ԱԺ ղեկավարության մակարդակով: Լրագրողների հետ զրույցում այս մանրամասները հայտնեց ՀՀ ԱԺ նախագահ Արարատ Միրզոյանը:
«Եկել է ժամանակը, պատրաստ եմ պատասխանել բոլոր հարցերին». Սերժ Սարգսյանն այցելեց ԱԺ
Նա ասաց, որ Սարգսյանը ԱԺ տարածք մուտք է գործել ծառայողական մուտքի դարպասով, ավտոմեքենայով, իսկ ԱԺ շենք՝ ԱԺ նախագահի համար նախատեսված առանձին միջանցքով:
«Գիտեք, որ ԱԺ նախագահի համար առանձն մուտք կա՝ անվտանգության նկատառումներից ելնելով, և Սերժ Սարգսյանին հնարավորություն է տրվել այդ մուտքով ու այդ միջանցքով գնալ: Այսինքն՝ ինչ որ անհրաժեշտ է եղել, արվել է»,- ասաց նա:
Քոչարյանի պատասխանից է կախված Սերժ Սարգսյանի` հանձնաժողովի նիստին մասնակցելու որոշումը
Սերժ Սարգսյանը լրագրողներին խոստացել էր ԱԺ հանձնաժողովի հետ հանդիպումից հետո հանդիպել նրանց հետ ու պատասխանել Ապրիլյան պատերազմին վերաբերող բոլոր հարցերին: Լրագրողները հետաքրքրվեցին նաև, թե ինչպես է ԱԺ նախագահը վերաբերվում նախկին նախագահի այս խոստմանը: Արարատ Միրզոյանը դժվարացավ տեսակետ հայտնել՝ նշելով, որ ՀՀ-ն ժողովրդավարական երկիր է, ու ցանկացած ոք իրավունք ունի իր կարծիքը հայտնելու:
Հիշեցնենք, որ Ապրիլյան քննիչ հանձնաժողովի ապրիլի 16-ի նիստը, որին մասնակցում էր Սերժ Սարգսյանը, տևեց շուրջ 5 ժամ։ Նիստին Սարգսյանը մասնակցում էր մեկ պայմանով` դրա տեսաձայնագրությունը պետք է իրեն տրամադրեն։ Սարգսյանն էլ իր հերթին պարտավորվել է մինչև 2050 թվականը նիստի ժամանակ հնչած հարցուպատասխանի մանրամասները չհայտնել։
Փոխարենը նաև լրագրողներին խոստացավ արտակարգ դրության ավարտից հետո հանդիպել ու պատասխանել Ապրիլյան պատերազմի մասին բոլոր հարցերին:
Ինչ է ասել Սերժ Սարգսյանն ԱԺ–ում. մանրամասներ դռնփակ նիստից. «Ժողովուրդ»
