Ավելի քան մեկ ամիս է, ինչ ինֆեկցիոն հիվանդանոցների բժիշկներն ու բուժքույրերը պայքարում են նոր վիրուսի դեմ։ Պացիենտների փրկության համար նրանք գործի են դնում բոլոր միջոցները, բայց հենց իրենց փրկում է միայն ժպիտը, որը նրանք կիսեցին Sputnik Արմենիայի նկարահանող խմբի հետ։
Բժիշկներն ու կամավորները խոստովանում են, որ արդեն տևական ժամանակ է` օրվա մեջ ընդամենը մի քանի ժամ են քնում, կարոտում են իրենց ընտանիքներին ու նախկին կենսակերպը։
Բուժաշխատողներից շատերը մեկուսացված են, իսկ տանը նրանց սպասում են փոքրիկ երեխաները, որոնց երբեմն անգամ չեն հասցնում նույնիսկ զանգել չափազանց ծանրաբեռնվածության պատճառով։ Իսկ եթե հաջողվում է ազատ րոպե գտնել, իսկույն բջջային կապով կամ առցանց զանգում են մտերիմներին ու հուսադրում նրանց։
Բժիշկները խոստովանում են, որ ամենաշատը կարոտել են ընտանիքի գրկախառնություններն ու տաք տնական ճաշերը։
Սեր, գույներ, թռչունների ծլվլոց՝ ի հեճուկս «տխուր դիմակների», կամ անսովոր գարունը Երևանում
Կորոնավիրուսի դեմ «պատերազմի» առաջամարտիկները չեն հուսահատվում. նրանք հավատում են իրենց գործին և առողջ ապագային։ Իսկ դա նրանց ուժ է տալիս և օգնում աշխատել անքուն գիշերներից հետո։ Բժիշկները հույս ունեն, որ քաղաքացիները կօգնեն իրենց և կնստեն տանը, որպեսզի իրենք արդեն ամռան սկզբին կարողանան տուն վերադառնալ։
Իսկ նրանց համար, ովքեր չեն գիտակցում խնդրի լրջությունը, «Նորք» ինֆեկցիոն հիվանդանոցի բուժաշխատողները հանել են դիմակները և ցույց տվել «համավարակի հետքերը»:
Հուսով ենք` սա տեսնելուց հետո դուք չեք ցանկանա դուրս գալ փողոց պարզապես զբոսնելու կամ ընկերոջ հետ շփվելու համար։
Հայաստանում կորոնավիրուսի տարածման դեմ պայքարի նպատակով մարտի 16-ից մինչև ապրիլի 14-ը արտակարգ դրություն է հայտարարված։
Ապրիլի 1-ից արտակարգ դրության ռեժիմը խստացվել է։ Ապրիլի 11-ի դրությամբ Հայաստանում կորոնավիրուսով վարակվածների թիվը հասել է 977-ի։ 13 մարդ մահացել է COVID-19-ի առաջացրած բարդությունների հետևանքով։
Աստրախանում հայն անվճար տեղափոխում է բժիշկներին. նրա մարտահրավերին 30 կամավոր է միացել
