ԵՐԵՎԱՆ, 6 ապրիլի – Sputnik․ Եթե պատրաստվում եք Փոթիում շուկա գնալ, ապա մուտքի մոտ ստիպված եք լինելու հանձնել ձեր փողերը։ Եվ դա կողոպուտ չէ, այլ արվում է ձեր իսկ անվտանգության համար։ Փողերը տաք արդուկով կարդուկեն և կվերադարձնեն ձեզ։ Տեղեկությունը հայտնում է Վրաստանի հանրային «Փիրվելի արխի» հեռուստաալիքը։
«Յուրաքանչյուր գնորդ, որը Վրաստանի արևմուտքում գտնվող Փոթի քաղաքի շուկա է ուզում մտնել, իր մոտ եղած փողը տալիս է մուտքի մոտ կանգնած մարդուն, որը մետաադրամները մշակում է ախտահանիչ լուծույթով, իսկ թղթադրամները` արդուկում։ Այնուհետև գումարը վերադարձնում է տիրոջը»,-նշվում է հրապարակման մեջ։
Բացի այդ, շուկայի ղեկավարության որոշմամբ, մուտքի մոտ քաղաքացիները ջերմաչափում են անցնում։ Բոլոր այցելուները ստանում են մեկանգամյա օգտագործման ձեռնոցներ։ Շուկայի ղեկավարությունը նաև հետևում է, որպեսզի մարդիկ պահպանեն սոցիալական հեռավորությունը։
«Ապրանք գնելու դեպքում վաճառողները մանրը վերադարձնում են ախտահանիչ լուծույթով մշակված դրամներով»,-ընդգծված է հրապարակման մեջ։
Համաճարակի ողնաշարը հաջողվել է ջարդե՞լ. Փաշինյանը լավ լուր հայտնեց
Նշենք, որ արդուկի տաքացման առավելագույն ջերմաստիճանը 115 աստիճանն է, նվազագույնը՝ 75։
Ապրիլի 5-ի դրությամբ Վրաստանում 170 մարդ է վարակվել կորոնավիրուսով, Հայաստանում՝ 822։ Երկու երկրներում էլ արտակարգ դրություն է հայտարարված։
Հայաստանում գործարկվել է կորոնավիրուսի հայտնաբերման բջջային հավելվածը
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ։ Կազմակերպությունը բոլոր երկրներին կոչ է արել միանալ վարակի դեմ ակտիվ պայքարին։
