ԵՐԵՎԱՆ, 2 ապրիլի - Sputnik. Հայաստանում կորոնավիրուսից հերթական` 6-րդ մահվան դեպքն է գրանցվել. տեղեկությունը Facebook սոցիալական ցանցի իր էջում գրում է ՀՀ առողջապահության նախարարի մամուլի խոսնակ Ալինա Նիկողոսյանը:
««Նորք» ինֆեկցիոն կլինիկական հիվանդանոցում արձանագրվել է մահվան դեպք։ 78-ամյա պացիենտն ունեցել է կորոնավիրուսային հիվանդություն, հաստատված երկկողմանի պոլիսեգմենտար թոքաբորբ, վերջինիս մոտ զարգացել է արյան մակարդելիության խանգարումներ, որն իր հերթին դժվարացրել է բուժման ընթացքը»,–գրել է նա։
Նիկողոսյանի խոսքով` մահացողը Հայաստանի Հանրապետության քաղաքացի չէ։
Հիշեցնենք, որ այսօր կորոնավիրուսից մահվան ևս մեկ դեպք էր գրանցվել` մահացողը 68-ամյա մի տղամարդ էր, որն ունեցել է ուղեկցող խրոնիկ հիվանդություններ, այդ թվում՝ սրտի իշեմիկ հիվանդություն, թոքերի խրոնիկ օբստրուկտիվ հիվանդություն։
Հայ բժիշկները շարունակում են պայքարել կորոնավիրուսի դեմ. տեսանյութ
Հայաստանում կորոնավիրուսով վարակված անձանց թիվն արդեն հասել է 663-ի` մեկ օրում ավելանալով 92-ով։ Երեկ հայտնի դարձավ, որ վարակվածներից մեկը մահացել է։ Մահվան առաջին դեպքը գրանցվել էր մարտի 26-ին։ Եվս երկուսը մահացել էին մարտի 29-ին։
Առողջապահության նախարար Արսեն Թորոսյանն այսօր լրագրողների հետ զրույցում ասել էր, որ կորոնավիրուսով վարակվածներից 5-ը ծայրահեղ ծանր վիճակում են. նրանցից մեկը երիտասարդ է։
