ԵՐԵՎԱՆ, 24 մարտի-Sputnik, Արմենուհի Մխոյան. Կորոնավիրուսի տարածման հետ կապված իրավիճակով պայմանավորված՝ Շիրակի մարզպետ Տիգրան Պետրոսյանի հրահանգով մարզի մանակապարտեզներում և դպրոցներում առկա սնունդը բաշխվում է տվյալ կրթական հաստատության սոցիալապես անապահով ու բազմազավակ ընտանիքներին: Տեղեկությունը Sputnik Արմենիայի հետ զրույցում հայտնեցին մարզպետարանից:
Ինչպես պետական, այնպես էլ այլ կազմակերպությունների ու ծրագրերի կողմից մեծ ծավալի մթերքի պահեստավորման խնդիրը լուծելու նպատակով Շիրակի մարզում արդեն գործում է պարենային և ոչ պարենային ապրանքների պահեստավորման կենտրոնը:
«Լոգիտսիկ առումով, այս պահին մարզում հստակեցված է մեկ պահեստային մեծ կետ, բայց անհրաժեշտության դեպքում, կաշխատենք համայքներում ևս մի քանի կետեր ունենալ»,-Sputnik Արմենիային տեղեկացրեց Շիրակի մարզպետ Տիգրան Պետրոսյանը՝ նշելով, որ որոշ կազմակերպություններ արդեն իսկ սեփական միջոցներով իրակացրել են սննդի տրամադրում իրենց շահառուներին:
«Տարեցների խնամքի ծառայություն իրականացնող «Առաքելություն Հայաստանին», «Կարմիր Խաչ» ու «Հայկական Կարիտաս» ընկերությունները, ուշադրութայն կենտրոնում պահելով իրենց շահառուներին, իրականացնում են այդ աշխատանքները»,-ասաց նա:
Այս աշխատանքներին զուգահեռ, մարզում շարունակվում է կորոնավիրուսի դեմ պայքարի համար կամավորների հավաքագրման գործընթացը: «Տարբեր գործառույթների համար կամավորագրված անձիք կներգրավվեն բուժհաստատություններում, սննդի բաշխման կամ այլ աշխատանքերում: Այս պահին հստակ չենք կարող ասել, թե քանի մարդ է պատրաստ կամավորության ՝ հավաքագրման գործընթացը շարունակվում է»,-ասաց մարզպետը:
Հավելենք, որ մարզի համայնքներում ստեղծվել և ակտիվորեն գործում են համայնքային օպերատիվ շտաբեր:
Համայնքային շտաբների կողմից մշտապես իրականացվում է ազգաբնակչության անձնական հիգիենայի պահպանման և ինքնամեկուսացման պայմանների վերաբերյալ անհրաժեշտ տեղեկությունների տրամադրում, կատարվում են հանրային նշանակության վայրերի, բազմաբնակարան շենքերի մուտքերի և հասարակական տրանսպորտի ախտահանման աշխատանքներ։
Հիշեցնենք, որ մարտի 24-ի ժամը 19:00-ի դրությամբ կորոնավիրուսով վարակվածների թիվը Հայաստանում հասել է 249–ի։ Վարակի դեպքեր ունենք Երևանում, Արմավիրի, Արարատի, Արագածոտնի, Կոտայքի, Սյունիքի, Շիրակի և Լոռու մարզերում:
Կորոնավիրուսի կանխարգելման նպատակով մարտի 16-ին Հայաստանում արտակարգ դրություն է սահմանվել, որը կտևի մինչև ապրիլի 14–ը:
