ԵՐԵՎԱՆ, մարտի 24 - Sputnik. Տնտեսության այն ճյուղերում, որոնք արտակարգ դրության պայմաններում պարետատան որոշմամբ չեն աշխատելու, պետք է հայտարարել հարկային արձակուրդ: Այսօր Աժ ամբիոնից նման հայտարարությամբ հանդես եկավ «Լուսավոր Հայաստան» խմբակցության պատգամավոր Գևորգ Գորգիսյանը:
«Եթե չեն գործելու այդ ընկերությունները, չեն ունենալու եկամուտ, բնական է, որ պետությունը նաև չպիտի ակնկալի այդ ընկերություններից իրենց հարկային պարտականությունների կատարում»,- ասաց Գորգիսյանը:
Ընդդիմադիր պատգամավորը նշեց, որ պետությունը պետք է նեցուկ լինի նաև այն քաղաքացիներին, որոնք այսօր իրենց կամքից անկախ զրկված են աշխատելու հնարավորությունից ու աշխատավարձ չեն ստանալու: Գորգիսյանը նշեց, որ այդ քաղաքացիներին պետբյուջեից պետք է առնվազն նվազագույն աշխատավարձի չափով փոխհատուցում տրամադրվի:
«Իմ քայլը» խմբակցության պատգամավոր Գայանե Աբրահամյանն էլ իր ելույթում նշեց, որ տեղծված իրավիճակում պետությանը պետք է նաև աջակցել, ու այդ հարցում մեծ է հատկապես խոշոր բիզնեսի պատասխանատվությունը:
Նոր մեկուսարանը գրեթե պատրաստ է. «Տա Աստված, այսպես դատարկ էլ մնա․․․»
«Եթե այս օրերին որոշ տնտեսվարողներ որոշել են գերշահույթներ ստանալ ճգնաժամի ճիրաններում հայտնված իրենց հայրենակիցների հաշվին, սրա պատասխանը չի ուշանալու: Եթե որոշ տնտեսվարողներ, հատկապես՝ խոշոր բիզնեսի կառավարիչներ, իրենց աշխատողներին պարտադրում են իրենց հաշվին արձակուրդ գնալ, չեն գիտակցում իրենց սոցիալական պատասխանատվությունն ու օրենքի պահանջը, ապա անցնում են ոչ միայն օրինականության սահմանները, այլև բարոյականությանի»,- ասաց Աբրահամյանը:
Պատգամավորը նշեց, որ եթե որոշ բանկեր ականջալուր եղան պետության հորդորին ու ընդառաջ գնացին իրենց վարկառուներին, ապա որոշ վարկային կազմակերպություններ, պատգամավորի բնորոշմամբ՝ «ահաբեկում են» իրենց հաճախորդներին:
«Բարգավաճ Հայաստանի» պատգամավոր Միքայել Մելքումյանն ԱԺ ամբիոնին մոտեցավ թվերով զինված:
«Ունենք 626 000 վարձու աշխատողներ, գումարած 400 000 մեր գյուղաբնակ աշխատող համաքաղաքացիները: Այդ 626 000-ից 203 000-ը պետական համակարգի աշխատողներն են, որոնք պետության կողմից վճարվում են անկախ աշխատանքի գնալուց, հեռավար աշխատելուց, նրանք ինչ-որ չափով ապահովված են: Մնացած շուրջ 400 000-ը մասնավոր ընկերություններում աշխատողներն են, որոնց մեծ մասն, այսպես կոչված, օրավարձով աշխատողներն են՝ տաքսու վարորդներ, բանվորներ, վաճառողներ և այլն»,- ասաց Մելքումյանը՝ շեշտելով, որ հատկապես խոցելի վիճակում է վերջին խումբը:
ԲՀԿ-ական պատգամավորը նաև նշեց, որ Հայաստանում շուրջ 500 000 մարդ սպառողական վարկ ունի, և ստեղծված իրավիճակում նրանց մեծ մասը վարկի վերադարձի լուրջ խնդիրներ ունեն:
Որպես լուծում՝ Մելքումյանն առաջարկում է ստեղծել պետական նպաստների համակարգի նման մեկ այլ ժամանակավոր համակարգ՝ եկամուտից զրկված քաղաքացիներին աջակցելու համար:
Սարգսյանը ստորագրեց արտակարգ դրության պահանջները խախտելու մասին օրինագիծը
