ԵՐԵՎԱՆ, 22 մարտի – Sputnik. ՀՀ ԱԻՆ «Հիդրոմետ» ծառայության պետ Գագիկ Սուրենյանն իր գրառումներով շարունակում է ուրախացնել կորոնավիրուսից մեկուսացած հայ ժողովրդին։ Այս անգամ նա շտապել է տեղեկացնել, որ 5 օր անընդմեջ հանրապետության ամբողջ տարածքում արևոտ ու տաք օրեր են սպասվում։
Գագիկ Սուրենյանը խոստանում է` տաք օդի ևս մի ալիք է գալիս Հայաստան
«Վաղվանից 5 օր երկրում դրախտային եղանակ է։ Կապույտ ջինջ երկինք, արև, անուշ, տաք օրեր»,- Facebook-ի իր էջում գրել է նա։
Ինչպես միշտ, այս անգամ ևս Սուրենյանի գրառմանը հաջորդել են բազմաթիվ մեկնաբանություններ, որոնք կապված են նաև կորոնավիրուսի հետ։
«Ափսոս տանն ենք», «ու հետո դժոխքայի՞ն», «Սուրենյան, էս վիրուսի դեմը մենակ դու կարաս առնես խոդի գցի տաքի վրա»,- գրել են Սուրենյանի հետևորդները։
Օգտատերերից մեկն էլ նեղսրտվել է, թե՝ հա ի՞նչ, մեկա տանն ենք մնալու», որին ի մեկ ուրիշն արձագանքել է՝ պատշգամբից կվայելենք։
Հիշեցնենք` Հայաստանում կորոնավիրուսով վարակվածների թիվը հասել է 190–ի։
Կորոնավիրուսի առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ էր, որն Իրանից Հայաստան էր ժամանել փետրվարի 28-ին: Նա արդեն դուրս է գրվել հիվանդանոցից։ Մարտի 11-ին ՀՀ–ում կորոնավիրուսի երեք նոր դեպք հայտնաբերվեց։
Վարակվածները եկել էին Իտալիայից։ Նրանցից մեկն Էջմիածնի բնակչուհի է և, ըստ լուրերի, գնացել էր Իտալիա` որդու ընտրյալի համար հարսանյաց զգեստ գնելու, այնուհետև Էջմիածնում մասնակցել էր որդու նշանադրությանը։ Դրանից հետո վարակակիրների թիվը սկսեց աճել։
Մարտի 16-ին ՀՀ վարչապետ Նիկոլ Փաշինյանը հայտնեց, որ կորոնավիրուսի դեպք է արձանագրվել նաև Երևանի արտադրական ձեռնարկություններից մեկում։
Դրանից հետո հաստատված դեպքերի մեծամասնությունը կապված էր հենց այդ արտադրամասի հետ:
Հայաստանում մարտի 16–ից ապրիլի 14-ը արտակարգ դրություն է հայտարարվել։
