ԵՐԵՎԱՆ, 19 մարտի – Sputnik. ՀՀ էկոնոմիկայի նախարար Տիգրան Խաչատրյանն այսօր լրագրողների հետ հանդիպմանը դժվարացավ գնահատել, թե ինչ ազդեցություն կունենա կորոնավիրուսով պայմանավորված իրավիճակը Հայաստանի տնտեսության վրա։
«Ոչ միայն Հայաստանի, այլև համաշխարհային տնտեսության վրա ազդեցությունը դեռ վերջնական պարզաբանում չունի»,- ասաց Խաչատրյանը։
Նրա խոսքով` ստեղծված իրավիճակն առաջին հարվածը հասցրել է Հայաստանի զբոսաշրջության ու հարակից ծառայությունների ոլորտին, տուժել է նաև արտահանման ոլորտը, հիմնականում՝ դեպի Ռուսաստան, և երրորդ ամենաշատ տուժած ոլորտը պղնձի արդյունահանումն ու պղնձի խտանյութի արտահանումն է։
Խաչատրյանը շեշտեց, որ պղնձի համաշխարհային գինն այս պահին հասել է նվազագույն սահմանագծին՝ 4800 դոլար 1 տոննայի դիմաց, այն դեպքում, երբ տարեսկզբին 1 տոննայի արժեքը մոտ է եղել 6000 դոլարին։
«Պղնձի ներկա գինը հայաստանյան արտահանողների համար չափազանց ցածր է»,–ընդգծեց նախարարը` միաժամանակ, սակայն, ձեռնպահ մնալով նշել, թե որն է այն նվազագույն սահմանը, որի դեպքում հայաստանյան պղնձի արդյունահանումը ձեռնտու չի լինի։
Հայաստանն ապահովված է սննդով, բայց գներն աճում են. վարչապետն առաջարկեց վերահսկել
«Ասել, թե կազմակերպություններից որն ինչպես կարձագանքի այդ գնին, հիմա դժվարանում եմ ասել, որովհետև նրանցից յուրաքանչյուրն ունեն ծախսային առանձնահատկություններ ու 1 տոննա խտանյութին բաժին ընկնող ինքնարժեք։ Սակայն ակնհայտ է, որ այս գինը երկարաժամկետ առումով շատ դժվար պայմաններ է ստեղծում կազմակերպություններից յուրաքանչյուրի համար»,- ասաց նախարարը։
Խաչատրյանը շեշտեց, որ պղինձ արդյունահանող կազմակերպությունները ՀՀ խոշոր հարկատուներ են, որոնց գործունեությամբ է պայմանավորված նաև ՀՀ տնտեսական ցուցանիշները։ Նախարարը չբացառեց, որ հարկ եղած դեպքում կառավարությունը կդիտարկի այդ ընկերություններին աջակցելու հնարավորությունը։
Ինչ վերաբերում է ներդրումային ծրագրերին, Խաչատրյանի տեղեկություններով, արտակարգ դրության պատճառով հետաձգված ներդրումային ծրագրեր այս պահին չկան։ Իսկ եթե ընթացիկ ծրագրերում խնդիրներ ծագեն, նախարարը խոստացավ, որ կառավարությունը դրանք առանձին կքննարկի։
«Ճիշտ կլինի, եթե պետությունը վարձու աշխատողներից այս ընթացքում եկամտային հարկեր չգանձի»
