ԵՐԵՎԱՆ, 16 մարտի — Sputnik. Կառավարության անդամները կորոնավիրուսի հետ կապված արտակարգ դրություն հայտարարելու շուրջ վերջնական համաձայնության այդպես էլ չեկան։ Եվ քանի որ նախագծում կային վիճարկելի հատվածներ`մեկ ժամ ընդմիջում վերցրին դրանք շտկելու և նոր տարբերակը կառավարության հավանությանն արժանացնելու համար։ Սա նշանակում է, որ նախագծով նախանշված` արտակարգ դրության մեկնարկի ժամը (ժ.17։00) կփոխվի։
Անհամաձայնություն առաջացրեց մասնավորապես Հայաստանի սահմաններն ամբողջությամբ փակելու` ԱԳ նախարար Զոհրաբ Մնացականյանի առաջարկը։ ՀՀ վարչապետ ՆԻկոլ Փաշինյանն այդ առաջարկին նույնիսկ կեսկատակ–կեսլուրջ արձագանքեց։
«Մենք չենք կարող ամբողջությամբ փակել մեր սահմանները։ Մեր թշնամու ուզածն էլ հենց դա է»,–ասաց վարչապետը։
Կառավարության անդամներից ոմանք առաջարկեցին ճանապարհները փակել մասնակի ու սահմանափակումներ մտցնել միայն առանձին երկրների համար, որտեղ վարակն առավել տարածված է։
Վիճելի կետերից էր նաև հանրային միջոցառումներն արգելելու դրույթը։ Կառավարության անդամներն անհանգստություն հայտնեցին թաղման արարողություններ ու հոգեհաց կազմակերպելու մասով։
ՀՀ կառավարությունը կորոնավիրուսի հետ կապված արտակարգ դրություն սահմանելու նախագծի քննարկումը կշարունակի ժամը 17։15–ին։
Հիշեցնենք` ՀՀ կառավարությունն այսօր արտահերթ նիստ էր հրավիրել արտակարգ դրություն հայտարարելու շուրջ որոշում ընդունելու համար։
Եկեղեցական արարողությունները կիրականացվեն առանց ժողովրդի
ԱԺ կանոնակարգ սահմանադրական օրենքի համաձայն` կառավարության՝ արտակարգ դրություն հայտարարվելու մասին որոշում ընդունելու դեպքում որոշման հրապարակումից հետո չորս ժամվա ընթացքում ԱԺ-ն գումարում է հատուկ նիստ։
Հարցի քննարկման ընթացքում հիմնական զեկուցմամբ հանդես է գալիս վարչապետը կամ կառավարության ներկայացուցիչը։ Որոշումն ընդունելու համար անհրաժեշտ է պատգամավորների ընդհանուր թվի բացարձակ մեծամասնությունը, այն է` 67 կողմ ձայն։
Հայաստանում արդեն կորոնավիրուսով վարակվելու 30 դեպք է հաստատվել։ Առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա տղամարդ էր, որն Իրանից Հայաստան էր ժամանել փետրվարի 28-ին: Նա արդեն դուրս է գրվել հիվանդանոցից։ Մարտի 11-ին ՀՀ–ում կորոնավիրուսի երեք նոր դեպք հայտնաբերվեց։
Վարակվածները եկել էին Իտալիայից։ Նրանցից մեկն Էջմիածնի բնակչուհի է և, ըստ լուրերի, գնացել էր Իտալիա` որդու ընտրյալի համար հարսանյաց զգեստ գնելու, այնուհետև Էջմիածնում մասնակցել էր որդու նշանադրությանը։ Դրանից հետո վարակակիրների թիվը սկսեց աճել։
Կորոնավիրուսով վարակվելու դեպքերից 8-ը հաստատվեցին երեկ։ Նրանց մեջ նաև Էջմիածնի դպրոցներից մեկում սովորող երեխա կա։ Վարակվածների առողջական վիճակը բավարար է, այդ թվում` նաև դպրոցահասակ երեխայինը: 2-ի մոտ թոքաբորբ կա, բայց, ըստ Փաշինյանի, նրանց կյանքին վտանգ չի սպառնում:
Նշենք, որ առնվազն մինչև մարտի 23-ը ՀՀ-ում չեն գործելու կրթական հաստատությունները։ ՀՀ ԿԳՄՍ նախարար Արայիկ Հարությունյանի հանձնարարությամբ` հատուկ առցանց հարթակներ են ստեղծվում հեռավար ուսուցում կազմակերպելու համար։ Չեն գործելու նաև թատրոնները, համերգասրահները, առևտրի խոշոր կենտրոնները, մի շարք մարզասրահներ։
Beeline-ը փակում է բոլոր գրասենյակները և երկարաձգում վճարումները
