Լիլիթ Հարությունյան, Sputnik Արմենիա
Երբեմն մեզ թվում է` մենք գրեթե ամեն ինչ գիտենք մեր մասին, սակայն ոչ միշտ է այդպես։ Շատ հաճախ մեզ իսկապես բացահայտում են կողքինները իրենց անաչառ հայացքով։ Մարտի 8-ի նախաշեմին որոշել ենք պարզել, թե հայուհիների մասին ինչ են մտածում օտարերկրացի կանայք, որոնք բախտի բերմամբ կամ պատահմամբ հայտնվել են Հայաստանում։
Կարծիքները տարբեր են, սակայն բոլորն էլ համակարծիք են երկու հարցում` հայուհիները հյուրասեր են ու ընտանիքին նվիրված, և նրանք չափից շատ են շպարվում։
Ներկայացնում ենք օտարերկրացի կանանց կարծիքը։ Նրանց հետ անձամբ ենք շփվել։
Ինչու են հայ կանայք տաքսու վարորդ աշխատում. մի կնոջ պատմություն
Մեգան Սթար, ԱՄՆ (բլոգեր)
Հայուհիները շատ բարեհամբույր են և հյուրընկալ։ Այստեղ միշտ կարող ես մի կնոջ գտնել, որը քեզ կօգնի ցանկացած հարցում։ Տեղացի աղջիկները շատ գեղեցիկ են, բայց, չգիտես ինչու, շատ են շպարվում` բնական գեղեցկությունը ցուցադրելու փոխարեն։
Չեմ կարողանում հասկանալ` ինչու է նրանց այդքան մտահոգում, թե իրենց մասին ինչ կմտածեն ուրիշները։ Հայուհիներն ուժեղ են, խելացի, գեղեցիկ, և նրանք ամենևին էլ կողմնակի անձանց գնահատականի կարիք չունեն։
Նատալյա Կոլոմազովա, Ռուսաստան (երեք երեխայի մայր)
Հայուհիները չափազանց պահանջկոտ են սեփական անձի հանդեպ։ Նրանք սիրում են և կարողանում են հյուր ընդունել։ Հեշտությամբ կարողանում են կես ժամում տարատեսակ ուտեստներով սեղան գցել։ Մաքրություն ու կարգուկանոն են պահպանում տանը, որտեղ շատ երեխաներ կան։ Առավոտյան 9-ին շպարված և հարդարված մազերով երեխային պոլիկլինիկա տանելն էլ խնդիր չէ նրանց համար։
Իմ կողակիցը հայ է, կամ հայ ամուսինների օտարազգի կանայք
Այդ առումով ինձ համար կատարյալ կին է ամուսնուս մայրը։ Նա հիանալի տնային տնտեսուհի է, միշտ խնամված, ժամանակ է գտնում թատրոն հաճախելու և ընկերուհիների համար, բարեհամբույր է և լավատես բոլոր հարցերում։ Ընդ որում` նա երեք երեխաների մայր է, 4 թոռների տատիկ, որոնց դաստիարակման գործում ակտիվ մասնակցություն ունի, և մինչ օրս աշխատում է որպես բժիշկ։
Կարոլին Կոստեն, Ֆրանսիա (գործարար)
Հայաստանը բավականին պահպանողական երկիր է։ Այստեղ մինչև հիմա էլ աղջկան (երբեմն էլ տղային) ստիպում են ամուսնանալ շատ երիտասարդ տարիքում։
Չնայած դրան, հայուհիները խելացի են, համարձակ և համառ։ Նրանք գիտեն` ինչպես օգուտ քաղեն իրենց վիճակից։ Միևնույն ժամանակ բազմաթիվ կանայք մի խնդիր ունեն. նրանց շատ են ճնշում ամուսնու ընտանիքում...
Երբեմն ինձ զարմացնում է, թե ինչպես են աղջիկները փորձում գրավել հակառակ սեռի ներկայացուցչի ուշադրությունը (օրինակ` վառ շպարով)` սեփական անհատականությունը գտնելու փոխարեն։ Թվում է` նրանք իրենց ավելի շատ տեսնում են որպես օբյեկտ, քան որպես սեփական ցանկություններ ունեցող կենդանի էակ։
Մեյսի Գալվան, ԱՄՆ (ուսուցչուհի Գավառի մոտ գտնվող գյուղերից մեկում)
Հավատում եմ, որ կանայք այս երկրի առանցքն են։ Նրանք անհավանական նվիրվածությամբ են հոգ տանում իրենց ընտանիքների մասին։
Աղջիկները քրտնաջան պարապում են դպրոցում, թեև երբեմն կրթությունը շարունակելու հնարավորություն չեն ունենում։ Ընտանիքները հաճախ թույլ չեն տալիս նրանց տեղափոխվել մայրաքաղաք և շարունակել ուսումը։ Ընդհանրապես գեղեցիկ սեռի ներկայացուցիչների համար մի շարք սահմանափակումներ կան։
Կարծում եմ, որ հայուհիները նրբազգաց են, աշխատասեր, նպատակասլաց։ Նրանք լավագույն մարդիկ են, որոնց հանդիպելու բախտ է վիճակվել ինձ։
Ելենա Կոժեմյակինա, Ռուսաստան (գործարար)
Մանկուց հայ կանանց մոտ սերմանում են «ես պարտավոր եմ» կարծրատիպը։ Դա հաճախ խանգարում է զարգացմանը, իսկ երբեմն էլ մեղքի զգացում ծնում, երբ անհաջողության են բախվում։
Հայուհիների առանձնահատկություններն են ջերմությունը, հարմարավետություն ստեղծելն ու դասական կանացիությունը։
Առավոտյան 9-ին հարդարված մազերով, երեկոյան դիմահարդարմամբ և տոնական զգեստով լինելու կարողությունը զվարճացնում է, բայց այդ աշխատատար հմտությանը շատերն են տիրապետում։
Ալիսա Սաֆրոնովա, Ռուսաստան (ուսուցչուհի, լրագրող)
Դրական կողմերից մեկն այն է, որ հայ կանանց համար ընտանիքն առաջին հորիզոնականում է։ Բացի այդ, շատ կանացի են։
Ինչ վերաբերում է բացասական կողմերին, ապա դրանցից մեկը սեփական սեքսուալությունը ժխտելն է։ Թերություն եմ համարում նաև զոհաբերությունը, չափից ավելի խոնարհ լինելը և այն, որ նրանց շատ է մտահոգում շրջապատի կարծիքը։
Ֆրեն Լինգարդ Հանսեն, ԱՄՆ (ուսուցչուհի)
Հայուհիների վարքագծի որոշ կետեր ինձ հիշեցնում են 60-ականներին ապրած իմ հայրենակից կանանց։ Ընդհանուր առմամբ հասարակության մեջ շատ է սեքսիզմը, շատ են դոգմաները, թե աղջիկն ինչ պետք է անի կամ ինչ չպետք է անի։
Մյուս կողմից, ես այստեղ շատ ամուր ընտանիքներ եմ տեսնում, իսկ ամուսնացած կանայք համընդհանուր աջակցություն և ընտանեկան սեր են վայելում։
Յուլյա Բերդնիկովա, Ռուսաստան (հոգեբան, լուսանկարիչ, մայր)
Ես հայուհիներին կբաժանեի 2 խմբի. նրանք, ովքեր մեծացել են Հայաստանում, և նրանք, ովքեր կյանքի որոշակի փուլն անցկացրել են արտասահմանում։ Առաջիններին ավելի շատ է մտահոգում հասարակական կարծիքը, և սեփական անձի կայացումը նրանք տեսնում են ընտանիք կազմելու մեջ։
Բացի դրանից, ես չեմ նկատել, որ սեփական առողջության մասին լրջորեն հոգան։ Առաջին խմբի հայուհիներն արտաքնապես կարող են ավելի գեղեցիկ լինել, բայց նրանց դեպքում առողջությունն առաջին տեղում չէ։
Իսկ երկրորդ դեպքում կանայք ավելի անկախ են, վստահ, փորձում են փոխել սեփական անձն ու շրջապատող աշխարհը։ Նրանք ավելի համարձակ են, ինչը դրսևորվում է նաև արտաքինում։ Չեն վախենում առանձին ապրել կամ միայնակ ճանապարհորդել։ Արտաքին տեսքին այդքան էլ մեծ ուշադրություն չեն դարձնում, բայց խնամված են։
Հայուհիները կանացի են և բավականին օժտված։ Նրանց դժվար է չնկատել այլազգի աղջիկների ֆոնին. վառ արտաքինն ու հանելուկային լինելն ուշադրություն են գրավում, եթե նույնիսկ շատ չեն շփվում։ Բացի այդ, հայուհիներն ամաչկոտ են։
Չեմ հասկանում սեփական ցանկությունների և երազանքների հաշվին բոլորին գոհացնելու նրանց ձգտումը։
Ագնեշկա Ռոլա–Կիրակոսյան, Լեհաստան
Հայուհիներն այս երկրի աղն են։ Եվ վերջ։
