ԵՐԵՎԱՆ, 6 մարտի — Sputnik. Ապրիլյան պատերազմի հանգամանքներն ուսումնասիրող խորհրդարանական հանձնաժողովի նախագահ Անդրանիկ Քոչարյանը Sputnik Արմենիային վստահեցրեց, որ ՀՀ երրորդ նախագահ Սերժ Սարգսյանի` Հայաստանում չլինելը չի խանգարի նրան հանձնաժողով հրավիրելուն։
«Սերժ Սարգսյանը դրսում լինի, թե ներսում լինի, հրավիրվելու է հանձնաժողով»,–ասաց Քոչարյանը։
Ապրիլյան պատերազմի հարցերով հանձնաժողովը լսել է գեներալ Մադոյանին
Իսկ թե երբ է հանձնաժողովը նախատեսում հրավիրել երրորդ նախագահին, Անդրանիկ Քոչարյանի խոսքով, դեռ որոշված չէ։ Որոշումը կայացվելու է հանձնաժողովի առաջիկա նիստերից մեկում։
«Ես տեսնում եմ, որ արդեն տարբեր ժամկետներ են նշում, մամուլում գրում են` իրենց տարբեր աղբյուրներից ու ցայտաղբյուրներից։ Բայց հանձնաժողովը կոնկրետ օրը դեռ չի որոշել, որովհետև նրան կանչելուց առաջ դեռ երկու հոգի պիտի գան»,– ասաց Քոչարյանը։
Նշենք, որ երկուսից մեկը 2016թ–ի ապրիլյան պատերազմի օրերին ՀՀ ԳՇ պետի պաշտոնը զբաղեցրած Յուրի Խաչատուրովն է։ Անդրանիկ Քոչարյանը հայտնեց, որ Խաչատուրովի հետ այդ թեմայով հեռախոսազրույց ունեցել է ու առաջիկայում նաև հրավեր կուղարկի։
«Հիմա տեսնենք, թե մեր հրավիրյալը երբ հարմար կգտնի գալու, որովհետև մենք չենք պարտադրելու։ Եվ ես կարծում եմ` գեներալ–գնդապետ Յուրի Խաչատուրովն ինքը կորոշի` ընդունել հրավերը, թե ոչ։ Համենայն դեպս, առ այսօր ում որ հրավիրել ենք, բոլորը հրավերն ընդունել են»,– ասաց Քոչարյանը։
Իսկ թե ով է լինելու երկրորդ հրավիրյալը Խաչատուրովից հետո ու Սերժ Սարգսյանից առաջ, Անդրանիկ Քոչարյանը չցանկացավ բացել փակագծերը` առաջարկելով, որ դա առայժմ թողնենք գաղտնիք մնա։
«Ապրիլյան հանձնաժողովը լավ կաներ` Նիկոլ Փաշինյանին հրավիրեր հարցաքննության». Շարմազանով
Նշենք, որ մամուլում տարածված լուրերի համաձայն` ՀՀ երրորդ նախագահ Սերժ Սարգսյանին նախատեսվում է Ապրիլյան պատերազմի հանգամանքներն ուսումնասիրող հանձնաժողով հրավիրել մինչև ապրիլի սկիզբ։
Սերժ Սարգսյանին հանձնաժողով հրավիրելու մասին, ի դեպ, քանիցս հայտարարել է նաև քննիչ հանձնաժողովի նախագահ Անդրանիկ Քոչարյանը, բայց առանց հստակ ժամկետ նշելու։
Ինչպես արդեն հայտնել ենք, Սերժ Սարգսյանն այս օրերին Հայաստանում չէ։ Նա մեկնել էր Բրյուսել և հանդիպում ունեցել Եվրոպական ժողովրդական կուսակցության (ԵԺԿ) նախագահ, Եվրոպական խորհրդի նախկին նախագահ Դոնալդ Տուսկի և մի շարք այլ անձանց հետ։
Հիշեցնենք` մոտ մեկ տարի է, ինչ ԱԺ-ում գործում է 2016 թվականի ապրիլին ծավալված ռազմական գործողությունների հանգամանքների ուսումնասիրման քննիչ հանձնաժողով։ 2019թ.–ին հանձնաժողովը 21 նիստ է գումարել, հրավիրվել են մեծ թվով զինվորականներ և բարձրաստիճան նախկին ու ներկա պաշտոնյաներ, որոնք պատասխանել են հանձնաժողովին հետաքրքրող հարցերին։
Ապրիլյան պատերազմի ժամանակ հայկական կողմը թերացել է. Դավիթ Տոնոյան
Բացի այդ, ՊՆ–ից հանձնաժողով են ուղարկել մեծ ծավալի փաստաթղթեր, որոնցից առայժմ ուսումնասիրվել է 2684 էջը` 147տեքստային և 14 գրաֆիկական քարտեզներով, տեղեկատվական–վերլուծական և հետախուզական, զորքերի կառավարման, օպերատիվ և այլ բնույթի գաղտնի և հույժ գաղտնի փաստաթղթերով։
