ԵՐԵՎԱՆ, 6 մարտի – Sputnik. Չինացի գիտնականները կորոնավիրուսով տարբեր ժամանակներում վարակված հիվանդների կլինիկական ախտանիշների միջև տարբերություններ են հայտնաբերել։ Դիտարկումները թույլ են տալիս ենթադրել, որ ժամանակի ընթացքում վիրուսը կարող է գրիպի ձև ընդունել կամ առանց ախտանիշների երկար ժամանակ գտնվել մարդու օրգանիզմում։ Հետազոտության արդյունքների նախնական տարբերակը հրապարակվել է Social Science Research Network (SSRN) կայքում։
Հակագազը` դիմակին այլընտրանք. երիտասարդը գտել է կորոնավիրուսից պաշտպանվելու իր տարբերակը
Մասնագետները հետևել են 89 պացիենտի, որոնք բուժվում են Ուհանի համալսարանի ժողովրդական հիվանդանոցում։ Նրանց երկու խմբի են բաժանել։ Առաջին` 31 մարդուց բաղկացած խմբում այն հիվանդներն են, որոնք հիվանդանոց են դիմել հունվարի 16-22-ը, երկրորդ խմբում 58 մարդ է, որոնք հոսպիտալացվել են հունվարի 23-29-ը։ Երկրորդ խմբում հիմնականում կանայք են (45–ը, 77,6%), իսկ առաջին խմբում կանայք 45,2% են կազմել։
Նշվում է, որ առաջին խմբի մոտ ավելի շատ են դիտարկվել այնպիսի ախտանիշներ, ինչպիսիք են բարձր ջերմությունը (67,7%), ուժերի անկումը (41,9%) և մկանային ցավը (22,6%)։ Առաջին խմբի պացիենտների 32,3% –ի մոտ նկատվել է խորխի թույլ արտազատում, մինչդեռ պացիենտների երկրորդ խմբում այդ ախտանիշը նկատվում է միայն 6,9%–ի մոտ։ Այլ ախտանիշներ, ինչպիսիք են հազը, սրտխառնոցը, լուծը և կրծքում սեղմվածության զգացողությունը, երկու խմբերի պացիենտների մոտ գրեթե չեն տարբերվել։ Բացի այդ, առաջին խմբի պացիենտների 54.2 %–ի մոտ լիմֆոցիտների քանակի պակաս է եղել։
Կորոնավիրուսի պատճառով Հայաստանն Իրանի հետ անցնում է վիզային ռեժիմի
«Այս հետազոտության դիտարկումները թույլ են տալիս ենթադրել, որ վերջերս վարակված հիվանդների առաջնային ախտանիշներն ավելի գաղտնի են, ինչպես նաև, որ նոր տիպի կորոնավիրուսը կարող է աստիճանաբար ձևափոխվել գրիպ հիշեցնող վիրուսի, կամ էլ որ վիրուսը կարող է երկար ժամանակ գաղտնի «ապրել» հիվանդությունն առանց ախտանշանների կրողների օրգանիզմում»,–ասվում է հետազոտության մեջ։
Չինաստանի կառավարությունը 2019 թվականի դեկտեմբերի 31-ին Առողջապահության համաշխարհային կազմակերպությանը հայտնել էր Ուհան քաղաքում անհայտ տեսակի թոքաբորբի բռնկման մասին։ Մասնագետները պարզել են, որ հիվանդության հարուցիչը նոր 2019-nCoV կորոնավիրուսն է։ ԱՀԿ–ն միջազգային նշանակության արտակարգ իրավիճակ է հայտարարել և հիվանդությանը տվել COVID-2019 պաշտոնական անվանումը։
Չինաստանի մայրցամաքային հատվածում վարակվածների թիվն անցնում է 80.5 հազարից, մահացել են 3042-ը, բուժվել` ավելի քան 53.7 հազարը։ ԱՀԿ վերջին տվյալների համաձայն` ՉԺՀ–ի սահմաններից դուրս մահացել է 267 մարդ։
Կորոնավիրուսի պատճառով չեղարկվել է ծանրամարտի պատանիների աշխարհի առաջնությունը
