Վահագն Ալեքսանյանի փոխանցմամբ` ստացվեց այնպես, որ քարոզարշավի համար նախատեսված նախապատրաստական շրջանը փոքր-ինչ երկարեց, ինչը կապված է քարոզչանյութերի տպագրման ժամանակի երկարաձգման հետ։ Ըստ այդմ`«Այո»–ի շտաբն ավելի ուշ ստացավ բուկլետներն ու պաստառները։
«Այս պահի դրությամբ նույնպես զբաղված ենք այդ քարոզչանյութերի տպագրության կազմակերպմամբ և դրանց բաշխման աշխատանքներով։ Հույս ունենք, մինչև այս շաբաթվա վերջն արդեն կկարողանանք սկսել քարոզարշավի ակտիվ փուլը։ Ամբողջ երկրում ունենք 65 շտաբ, ներկայումս զբաղված ենք նաև շտաբների միջև քարոզչանյութերի բաշխման աշխատանքներով»,– նշում է «Այո»–ի շտաբի խոսնակը։
Վահագն Ալեքսանյանի տեղեկացմամբ` մարզերում քարոզչական հարցերով հիմնականում զբաղվում են տվյալ տարածքներից ընտրված պատգամավորները, և նրանց կազմակերպչական գործերում օգնում է «Քաղաքացիական պայմանագիր» կուսակցության մարզային ակտիվը։ Հենց ի սկզբանե նախատեսված էր, որ մինչև վարչապետի քարոզարշավին միանալը, պատգամավորները մարզերում, գյուղերում և Երևանում կիրականացնեն բակային հանդիպումներ։
«Մեր հաշվարկներով վստահաբար կհասցնենք իրականացնել նախանշված աշխատանքները, որովհետև քարոզարշավի համար սահմանված ժամանակահատվածը բավականին երկար է, նույնիսկ երկու անգամ ավելի ժամանակ է հատկացված 2018թ.–ի խորհրդարանական ընտրությունների համեմատ»,– նշում է «Այո»–ի շտաբի խոսնակը։
Մելիքյան. «Մեզ զրպարտում են հանրության ուշադրությունը հիմնական խնդիրներից շեղելու համար»
Ինչ վերաբերում է նախարար Սուրեն Պապիկյանի կողմից ԱԺ ամբիոնը քարոզչական նպատակներով օգտագործելուն, Վահագն Ալեքսանյանը պնդեց, որ ԱԺ ամբիոնը երկրի թիվ մեկ քաղաքական ամբիոնն է, հանրաքվեն էլ այս պահի դրությամբ երկրի թիվ մեկ քաղաքական օրակարգը։ Ընդդիմախոսների տեսած խնդիրն այն է, որ Սուրեն Պապիկյանն իր պաշտոնական լիազորությունները կատարելու ժամանակահատվածում է դա արել, ու եթե մարդկանց ընտրատեղամասեր գնալու խորհուրդ տար միայն ու չհորդորեր «Այո» քվեարկել, ապա, ըստ Ալեքսանյանի, ոչ մի խնդիր էլ չէր առաջանա։ Ըստ նրա` ֆիզիկական ծանրաբեռնվածությունն ուղղակի թույլ չի տվել Սուրեն Պապիկյանին ճիշտ պահի դադար պահել ու նա ասել է այդ մեկ բառը։
Հանրաքվեն ելք չէ. Պուերտո Ռիկոն` վառ օրինակ
Անդրադառնալով այն տեղեկությանը, որ կորոնավիրուսի հետ կապված հանրաքվեն կարող է հետաձգվել, Վահագն Ալեքսանյանը նշեց, որ եթե համաճարակի շատ դեպքեր լինեին գրանցված, ապա ողջամտությունը կդրդեր հետաձգել կամ կասեցնել գործընթացը, բայց քանի որ կա ընդամենը մեկ հաստատված դեպք, ուստի այս պահին անհանգստանալու կարիք չկա։
