Իրանի մեջլիսում Թեհրանի և հյուսիսային իրանահայության պատգամավոր Կարեն Խանլարյանը Sputnik Արմենիայի հետ զրույցում վստահեցրեց, որ թեև կորոնավիրուսի վարակն Իրանում շատ արագ է տարածվում, սակայն Իրանի հայերի շրջանում կորոնավիրուսով վարակվածներ չկան։
Իրանահայ պատգամավորն ասաց, որ կորոնավիրուսի վտանգով պայմանավորված, երկրում չեն գործում նաև հայկական դպրոցները։
«Այս պահին Թեհրանի 12 և Թավրիզի 2 հայկական դպրոցները չեն գործում։ Հրահանգված է աշակերտներին բժշկական դիմակներ ու ձեռնոցներ բաժանել, իրականացնում ենք նաև այլ կանխարգելիչ միջոցառումներ»,-ասաց Խանլարյանը։
Պատգամավորի խոսքով, հանրության շրջանում թեև որոշակի խուճապ կա, սակայն Իրանը կորոնավիրուսի հետ կապված իրավիճակին ավելի հանգիստ է վերաբերվում, քան մնացած երկրները։
«Իրանն ավելի սառնասրտորեն է մոտենում այս հարցին, չնայած նրան, որ մեջլիսի պատգամավորներից էլ են վարակվել կորոնավիրուսով»,-ասաց նա։
Հիշեցնենք` Չինաստանի իշխանությունը Ուհան քաղաքում անհայտ ծագման թոքաբորբի բռնկման մասին Առողջապահության համաշխարհային կազմակերպությանը (ԱՀԿ) տեղեկացրել էր 2019 թվականի դեկտեմբերի 31-ին։ Մասնագետները պարզել են, որ հիվանդության հարուցիչը կորոնավիրուսն է։ ԱՀԿ–ն միջազգային նշանակության արտակարգ իրավիճակ է հայտարարել և հիվանդությանը տվել COVID-2019 պաշտոնական անվանումը։
COVID-2019 վիրուսը շարունակում է տարածվել ոչ միայն Չինաստանում, որտեղ գրանցվեց առաջին բռնկումը, այլև երկրի սահմաններից դուրս: Մասնավորապես, հարևան Իրանում։
Իրանի հետ ցամաքային սահմանը երկու շաբաթով փակելու մասին Հայաստանի կառավարությունը հայտարարեց փետրվարի 24-ին։ Օդային հաղորդակցության մասով ևս որոշակի սահմանափակումներ են կիրառվել, սակայն Հայաստան ժամանած Իրանի բոլոր քաղաքացիները կկարողանան հետ վերադառնալ, իսկ Իրանում գտնվող ՀՀ քաղաքացիները` գալ Հայաստան։
Իրանի իշխանությունները որոշում են կայացրել ամբողջ երկրով մշակութային միջոցառումների չեղարկումը երկարաձգել մինչև մարտի 6-ը։
Ներկայում փակ են բոլոր ուսումնական հաստատությունները։
Իրանում ՀՀ դեսպանությունն աշխատում է արտակարգ ռեժիմով. նոր տեղեկություններ
