ԵՐԵՎԱՆ, 29 փետրվարի–Sputnik. Իրանում կորոնավիրուսի տարածման հետ կապված վիճակը շարունակում է լարված մնալ։ Վերջին օրվա ընթացքում Իրանում կորոնավիրուսով վարակվածների թիվն ավելացել է գրեթե 205-ով` այդպիսով դառնալով 593։ 43 մարդ մահացել է, 123–ը` առողջացել։
Իրանում կորոնավիրուսից ֆուտբոլիստ է մահացել. երիտասարդ աղջկան չեն կարողացել փրկել
Այսօր Չինաստանից բժիշկների խումբ է ժամանել Իրանի մայրաքաղաք Թեհրան։ Մասնագետները նաև դիմակներ ու դեղորայք են բերել իրենց հետ։ Այս մասին տեղեկացնում է Parstoday-ը։ Հիշեցնենք, որ դեռ նախորդ շաբաթ Իրանում Չինաստանի դեսպան Չանգ Հուան տեղեկացրել էր, որ Չինաստանն Իրան է ուղարկել կորոնավիրուսը հայտնաբերող 5 հազար թեստ և 250 հատուկ բժշկական դիմակ։
Իրանը դարձավ աշխարհում առաջին երկիրը, որտեղ գրանցվեցին իշխանության ներկայացուցիչների` կորոնավիրուսով վարակման դեպքեր։ Այս պահին հայտնի է, որ կորոնավիրուսով վարակված է մեջլիսի 5 պատգամավոր։
«Անալիզներ հանձնած 100 պատգամավորից 5-ի դեպքում թեստը դրական է եղել։ Կթեստավորվեն նաև մյուս պատգամավորները»,– նշել է Ասադուլա Աբասին։
Մեջլիսի պրեզիդիումի նախագահ Ասադուլա Աբասին նախօրեին հայտարարել է, որ կորոնավիրուսով մի քանի պատգամավորի վարակվելուց հետո Իրանի խորհրդարանը դադարեցրել է աշխատանքը։
Ավելի վաղ հայտնել էինք, որ կորոնավիրուսով վարակվել է նաև Իրանի կանանց և ընտանիքի հարցերով փոխնախագահ Մասումե Էբթեքարը։ Կորոնովիրուս է արձանագրվել նաև Իրանի առողջապահության փոխնախարար Իրաջ Հարիրչիի մոտ։ Փետրվարի 27-ին կորոնավիրուսից մահացել է Վատիկանում և Եգիպտոսում Իրանի նախկին դեսպան Հադի Խոսրովշահին։
Իրանը դարձավ նաև աշխարհի առաջին երկիրը, որտեղ արձանագրվեց կորոնավիրուսից ֆուտբոլիստի մահվան դեպք։ ֆուտզալի պրոֆեսիոնալ խաղացող` 23-ամյա Իլհամ Շեյխին 10 օր պայքարեց հիվանդության դեմ, սակայն բժիշկներին չհաջողվեց փրկել երիտասարդ աղջկա կյանքը։ Իրանի Իսլամական Հանրապետության հետ սահմանը փակել են Հայաստանը, Թուրքիան, Ադրբեջանը, Վրաստանը։
Հիշեցնենք, որ Իրանի հետ ցամաքային սահմանը երկու շաբաթով փակելու մասին Հայաստանի կառավարությունը հայտարարեց փետրվարի 24-ին։ Օդային հաղորդակցության մասով ևս որոշակի սահմանափակումներ են կիրառվել, սակայն Հայաստան ժամանած Իրանի բոլոր քաղաքացիները կկարողանան հետ վերադառնալ, իսկ Իրանում գտնվող ՀՀ քաղաքացիները` գալ Հայաստան։
Իրանի իշխանությունները որոշում են կայացրել ամբողջ երկրով մշակութային միջոցառումների չեղարկումը երկարաձգել մինչև մարտի 6-ը։
Ներկայում փակ են բոլոր ուսումնական հաստատությունները։
Իրանը պաշտոնապես զբաղեցնում է երկրորդ տեղը Չինաստանից հետո կորոնավիրուսից մահացածների թվով, իսկ երրորդ տեղում Իտալիան է։
Կորոնավիրուսի բռնկում Իրանում. խորհրդարանը դադարեցնում է աշխատանքը
Այս պահին աշխարհի 61 երկրներում կորոնավիրուսով վարակվելու դեպքեր են գրանցվել։ Կարանտինում է ճապոնական նավահանգստային Յոկոհամա քաղաքում 3,7 հազար ուղևոր ունեցող «Ադամանդե արքայադուստր» նավը։ Այս պահին արձանագրվել է 705 կորոնավիրուսով վարակվածության դեպք, 6 մահ, 10-ն ապաքինվել են։
