ԵՐԵՎԱՆ, 28 փետրվարի – Sputnik. Եթե Երևանը Ադրբեջանի հետ սահմանին տեղի ունեցած միջադեպերի վերաբերյալ դիմի ՀԱՊԿ–ին, կառույցը Հայաստանին անհրաժեշտ օգնություն կցուցաբերի։ ՀԱՊԿ գլխավոր քարտուղար Ստանիսլավ Զասը սա ասաց` պատասխանելով Sputnik Արմենիայի թղթակցի հարցին։
«Ղարաբաղյան հակամարտության խնդիրը մշտապես ՀԱՊԿ–ի ուշադրության կենտրոնում է։ Մենք արդեն լավ համակարգ ենք կառուցել, որով Հայաստանը մյուս պետություններին կարող է տեղեկացնել այդ խնդրի մասին։ Անհրաժեշտության դեպքում ՀԱՊԿ–ը արտահայտվում է այդ հարցի շուրջ, ինչն արդեն բազմիցս եղել է»,–ասաց Զասը։
ՀԱՊԿ գլխավոր քարտուղարն ասաց, որ կազմակերպությունը հակամարտության խաղաղ կարգավորման կողմնակից է ու տեսնում է խնդրի լուծումը միայն քաղաքական ճանապարհով, ԵԱՀԿ Մինսկի համանախագահների միջնորդությամբ ու հիմնվելով միջազգային իրավունքի սկզբունքների, ՄԱԿ–ի կանոնադրության ու Հելսինկիի եզրափակիչ ակտի վրա։
ՀԱՊԿ–ից պարզաբանել են` ինչու է կարևոր Հայաստանի պաշտպանական ներուժի ուժեղացումը
Ինչ վերաբերում է հայ–ադրբեջանական սահմանին տեղի ունեցող միջադեպերին, Զասն ասաց, որ եթե Հայաստանն օգնության համար դիմի ՀԱՊԿ–ին, կազմակերպությունը կարտահայտի իր դիրքորոշումն ու անհրաժեշտ օգնություն կցուցաբերի։
«Այժմ Հայաստանի կառավարությունն ինքնուրույն է լուծում սահմանային միջադեպերի հարցը։ Իհարկե, հուսով ենք, որ իրավիճակը կլինի կայուն և կհաջողվի խուսափել այդ բախումներից»,–նշեց Զասը։
Տոնոյանն ու Զասը քննարկել են ՀԱՊԿ ռազմական բաղադրիչի զարգացման գործընթացը
Հիշեցնենք, որ հայ–ադրբեջանական սահմանին վերջին միջադեպը գրանցվել էր օրեր առաջ` փետրվարի 24–ին։ Ադրբեջանական զինված ուժերը կրակ էին բացել Տավուշի մարզի մարտական դիրքերի ու Կոթի գյուղի ուղղությամբ։ Կրակոցների հետևանքով պայմանագրային զինծառայող էր վիրավորվել։
