ԵՐԵՎԱՆ, 27 փետրվարի — Sputnik. Ճապոնիայում և Կորեայում նոր տիպի կորոնավիրուսով (COVID-19) վարակվածների թվի կտրուկ աճով պայմանավորված՝ ներկայումս Ճապոնիայում և Կորեայում գտնվող և այցով ժամանող ՀՀ քաղաքացիներին Ճապոնիայում և Կորեայում ՀՀ դեսպանությունը կոչ է անում կապ հաստատել իրենց հետ՝ փոխանցելով կոնտակտային տվյալները։
«Ճապոնիայում և Կորեայում գտնվող ՀՀ քաղաքացիներին հորդորում ենք նաև խուսափել վիրուսի բացահայտման մեծաքանակ դեպքեր գրանցած շրջաններ (Ճապոնիայում՝ Հոկկայդո, Կանագավա, Տոկիո, Չիբա, Իշիկավա, Վակայամա և Օկինավա նահանգներ, Կորեայի Հանրապետությունում՝ Սեուլ, Դեգու, Կվանգջու քաղաքներ, ինչպես նաև Գյոնսան նահանգ) այցելելուց»,–ասված է հայտարարության մեջ:
Դեսպանությունը խորհուրդ է տալիս հետևել ՀՀ առողջապահության նախարարության, ինչպես նաև Ճապոնիայի և Կորեայի համապատասխան իշխանությունների ցուցումներին։
Տեղեկացվում է նաև, որ գործում է Ճապոնիայի Զբոսաշրջային Ազգային կազմակերպության թեժ գիծը՝ 050-3816-2787 հեռախոսահամարով և Կորեայի Զբոսաշրջային կազմակերպության թեժ գիծը՝ 1330 հեռախոսահամարով: Դեսպանության կոնտակտային տվյալներն են՝
#230 Residence Viscountess, 1-11-36 Akasaka,
Minato-ku, Tokyo 107-0052, Japan
Հեռ. 03-6277-7453
armembjapan@mfa.am
Կորոնավիրուսի պատճառով ՊՆ–ն արգելել է զորամասերում այցելություններն ու արձակուրդները
Նշենք, որ Ճապոնիայում կորոնավիրուսից մահացածների թիվը հասել է 7-ի։ Անցած մեկ օրում Ճապոնիայում կորոնավիրուսով հիվանդանալու 15 նոր դեպք է գրանցվել, վարակվածների ընդհանուր թիվը հասել է 891-ի, որոնցից 705-ը Diamond Princess–ի ուղևորներն ու նավի անձնակազմի անդամներն են:
Իսկ Հարավային Կորեայում գրանցվել է կորոնավիրուսով վարակման 334 նոր դեպք։ Երկրում վարակվածների թիվը հասել է 1 595-ի: Կորոնավիրուսից մահացել է 12 մարդ, ապաքինվել են 24–ը։
Նշենք, որ երեկ` փետրվարի 26–ին, Վրաստանում հաստատվել է կորոնավիրուսով վարակվելու առաջին դեպքը։ Վարակվածը Վրաստանի քաղաքացի է, որը ժամանել Իրանից։ 50 տարեկան տղամարդը Վրաստան է հասել Ադրբեջանով։ Առողջապահության նախարարը նշել է, որ վարակված տղամարդն անմիջապես տեղափոխվել է Թբիլիսիի ինֆեկցիոն հիվանդանոց, և նա այլ մարդկանց հետ շփում չի ունեցել։
