ԵՐԵՎԱՆ, 27 փետրվարի — Sputnik. ՀՀ առողջապահության նախարար Արսեն Թորոսյանը Facebook-ի իր էջում գրել է, որ խոսել է Վրաստանի առողջապահության նախարարի հետ և պարզել Վրաստանում կորոնավիրուսի հետևանքով ստեղծված իրավիճակը։
«Քիչ առաջ խոսեցի Վրաստանի առողջապահության նախարար Եկատերինե Տիկարաձեի հետ, որպեսզի հասկանամ կորոնավիրուսով պայմանավորված իրավիճակը մեր հարևան երկրում: Նախարարի հավաստմամբ` կորոնավիրուսով ախտորոշված պացիենտի հետ շփված 4 անձինք հետազոտվել են և նրանց մոտ չի հայտնաբերվել վարակը: Նրանք 14 օր կմնան մեկուսացման մեջ»,–գրել է նախարարը:
Նշենք, որ երեկ Վրաստանում հաստատվել է կորոնավիրուսով վարակվելու առաջին դեպքը։ Վարակվածը Վրաստանի քաղաքացի է, որը երեկ է ժամանել Իրանից։ 50 տարեկան տղամարդը Վրաստան է հասել Ադրբեջանով։ Առողջապահության նախարարը նշել է, որ վարակված տղամարդն անմիջապես տեղափոխվել է Թբիլիսիի ինֆեկցիոն հիվանդանոց, և նա այլ մարդկանց հետ շփում չի ունեցել։
Նոր տեսակի թոքաբորբի բռնկման պատճառով Վրաստանը ժամանակավորապես դադարեցրել է Չինաստանից և Իրանից իրականացվող թռիչքները։ Արգելվել է կենդանիների ներկրումը ՉԺՀ–ից։ Օդանավակայաններում և Վրաստանի պետական սահմանով անցնող անցակետերում մասնագետները ստուգում են բոլոր ճանապարհորդներին։
Չինաստանի իշխանությունը Ուհան քաղաքում անհայտ ծագման թոքաբորբի բռնկման մասին Առողջապահության համաշխարհային կազմակերպությանը (ԱՀԿ) տեղեկացրել էր 2019 թվականի դեկտեմբերի 31-ին։ Մասնագետները պարզել են, որ հիվանդության հարուցիչը կորոնավիրուսն է։ ԱՀԿ–ն միջազգային նշանակության արտակարգ իրավիճակ է հայտարարել և հիվանդությանը տվել COVID-2019 պաշտոնական անվանումը։
Կորոնավիրուսի ստուգման նպատակով Հայաստանում 1 ամսում 37 մարդ է հոսպիտալացվել
Վերջին տվյալներով` ամբողջ աշխարհում վարակվածների թիվը 81 184 է, մահացել է 2769 մարդ, առողջացել ավելի քան 30 հազարը։
ԱՀԿ–ի վերջին տվյալներով` ՉՀԺ–ի սահմաններից դուրս վարակի դեպքեր են գրանցվել 34 երկրում։
