ԵՐԵՎԱՆ, 25 փետրվարի — Sputnik. ՀՀ Արդարադատության նախարար Ռուստամ Բադասյանն այսօր ԱԺ-ում լրագրողների հետ ճեպազրույցում անդրադարձավ մամուլում իր պարգևավճարների մասին հրապարակումներին։
«Ես ստանում եմ այնքան պարգևավճար, որքան ստանում են բոլոր նախարարները՝ միասնական որոշված սկզբունքի համաձայն: Նույնիսկ, մի փոքր պակաս եմ ստացել այդ գումարից»,- ասաց Բադասյանը։
Նշենք, որ մամուլի հրապարակումների համաձայն` Արդարադատության նախարարությունը 2019 թվականին ստացել է 13 598 570 ՀՀ դրամ պարգևավճար, որից մոտ 8 միլիոնը կամ 16 հազար դոլարը ստացել է Ռուստամ Բադասյանը։
Ըստ հրապարակումների, նախարարի պարգևավաճարի չափն անցած տարվա բոլոր ամիսներին կազմել է 1 342 830 ՀՀ դրամ, իսկ հուլիս և հոկտեմբեր ամիսներին՝ շուրջ 1 200 000 ՀՀ դրամ։
