ԵՐԵՎԱՆ, 24 փետրվարի – Sputnik. ՀՀ արտգործնախարար Զոհրաբ Մնացականյանն այսօր կայացած ասուլիսի ժամանակ հայտնեց, որ Հայաստանի կառավարությունը կոնկրետ քայլեր է մշակում կորոնավիրուսի ներթափանցումը կանխելու ուղղությամբ։
«Կորոնավիրուսի տարածումը մարտահրավեր է բոլոր երկրների համար, և համագործակցության միջոցով պետք է գտնել ուղիներ, որպեսզի իրավիճակը վերահսկենք, հաղթահարենք և կանխարգելենք։ Մենք շատ սերտ աշխատել ենք Չինաստանի հետ, հիմա շատ սերտ աշխատում ենք Իրանի հետ»,– ասաց նա։
Նշենք, որ կորոնավիրուսի զոհերի թիվը Չինաստանում է հասել է 2592–ի, վերջին քսանչորս ժամում մահացել է 150 վարակակիր։
Մահաբեր վարակն արդեն դուրս է եկել Չինաստանի սահմաններից ու հասել նաև Հայաստանին սահմանակից Իրանի Իսլամական Հանրապետություն։ Վերջին տվյալների համաձայն ՝ Իրանում արդեն գրանցվել է կորոնավիրուսով վարակվելու 43 դեպք։ Զոհերի թիվը հասել է 8-ի։
Իրանում ՀՀ դեսպանության հյուպատոսական բաժինը փետրվարի 23–ից ժամանակավորապես դադարեցրել է աշխատանքը՝ քաղաքացիների մուտքն ու ընդունելությունը:
ՀՀ վարչապետ Նիկոլ Փաշինյանն այսօր հայտնեց, որ որոշվել է երկու շաբաթով դադարեցնել ցամաքային հաղորդակցությունը Իրանի Իսլամական Հանրապետության հետ։
