ԵՐԵՎԱՆ, 20 փետրվարի — Sputnik. ՀՀ առողջապահության նախարարությունը տեղեկացնում է, որ «Մեղրի» անցակետում էլ ավելի կուժեղացվի հսկողությունը՝ Իրանում կորոնավիրուսի տարածման հետ կապված։
«Առողջապահության նախարարությունն անմիջապես կապ է հաստատել ԻԻՀ-ում թե´ հայկական դեսպանատան և թե´ առողջապահության նախարարության հետ: Արդյունքում պարզվել է, որ Իրանում կորոնավիրուսով վարակման 5 դեպք է արձանագրվել։ Դրանցից 4-ը Ղոմ քաղաքում, որից 2-ը՝ մահվան ելքով, և Արակ քաղաքում՝ 1 դեպք»,–նշված է հաղորդագրության մեջ։
Ինչ վերաբերում է կորոնավիրուսի` Հայաստան մուտքը կանխարգելելուն, ապա Հայաստանում փետրվարի 20-ի, ժամը 15:00-ի դրությամբ հնարավոր վարակման դեպքերով իրականացված հետազոտությունների (այդ թվում՝ լաբորատոր) արդյունքները եղել են բացասական։
Բացի այդ, Չինաստանից եկած բոլոր անձինք գտնվում են բժշկական հսկողության ներքո, իսկ նրանք, ովքեր ունեն անգամ թեթևակի ջերմություն հոսպիտալացվում են և անցնում բոլոր հետազոտությունները:
Իրանում երկու մարդու մոտ կորոնավիրուս է ախտորոշվել
Հիշեցնենք, որ Չինաստանում համաճարակային իրավիճակը` պայմանավորված նոր կորոնավիրուսային (COVID-2019) վարակով, դեռևս լարված է: Ըստ Առողջապահության համաշխարհային կազմակերպության (ԱՀԿ) տվյալների` ընթացիկ տարվա փետրվարի 19-ի դրությամբ Չինաստանում արձանագրվել է նոր կորոնավիրուսային վարակի 74 280 հաստատված դեպք, որից 2006-ը մահվան ելքով: Չինաստանից դուրս 25 երկրում արձանագրվել է 924 հաստատված դեպք (3 մահվան ելքով): Ըստ ԱՀԿ-ի` ամբողջ աշխարհում հաստատվել է նոր կորոնավիրուսային վարակի 75 204 դեպք։
Կորոնավիրուսի պատճառով կսահմանափակեն iPhone–ի մատակարարումն ամբողջ աշխարհով
Համաձայն չինական կայքի (20.02.2020թ., ժամը 09:05) հրապարակած տեղեկությունների` արձանագրվել է 74 675 հաստատված դեպք, որից 2121-ը` մահվան ելքով: Ծանր վիճակում են 11 864-ը, առողջացել են 16 192-ը:
