ԵՐԵՎԱՆ, 24 փետրվարի — Sputnik. Բուհերի կառավարման խորհուրդներում պաշտոնյաներ ու քաղաքական գործիչներ չպետք է լինեն։ Այսօր ԱԺ-ում գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախաձեռնությամբ կազմակերպված «Բարձրագույն կրթության և գիտության ոլորտի օրենսդրական բարեփոխումներն ու հիմնախնդիրները» թեմայով խորհրդարանական լսումների ժամանակ նման հայտարարություն արեց ԿԳՄՍ նախարար Արայիկ Հարությունյանը։
Երեխան չի ուզում խառատ կամ եռակցող դառնալ. կրթության առաջարկն ու պահանջարկը չեն համընկնում
Այս կարգավորումը, նրա խոսքով, ներառված է բարձրագույն կրթության մասին նոր օրենքի նախագծում։
Հարությունյանի խոսքով` նախատեսվում է բուհերի կառավարման խորհուրդների անդամների թիվը սահմանել տասը։ Նրանցից 6-ը կլինեն բուհի ներկայացուցիչներ, այդ թվում՝ 1 ուսանող։ Եվս 4-ը կլինեն գործարարներ ու հասարակական գործիչներ։
«Մենք տասնամյակներով ունեցել ենք կարծրացող ու կարծրացած համակարգ, որի հետևանքով այս օրենքը դիպչում է հասարակության բոլոր անդամների շահերին։ Տասնամյակներով մարդիկ ստեղծել են խմբեր, պարտադրել ծրագրեր, որոնք իրենց ազդեցությունը կունենային կրթական համակարգի վրա»,-ասաց նախարարը։
Դրամ հավաքող ուսուցիչն ու տնօրենը կհայտնվեն ոստիկանության թիրախում
Արայիկ Հարությունյանը նշեց, որ այդ համակարգն այսօր էլ շարունակում է դիմադրել ՀՀ նոր իշխանությունների առաջարկած հեղափոխական փոփոխություններին։
Հակառակ դրան, Արայիկ Հարությունյանը շեշտեց, որ փոփոխությունները լինելու են, ընդ որում, կառավարությունը բաց է կառուցողական առաջարկների համար։
ԿԳՄՍ նախարարը հայտնեց, որ օրենքի առաջին տարբերակում, որն արժանացել էր բուռն քննադատությունների, արդեն որոշ փոփոխություններ արվել են։
