ԵՐԵՎԱՆ, 23 փետրվարի — Sputnik. Թուրքիայի իշխանությունները փակել են Իրանի հետ սահմանը՝ Իսլամական Հանրապետությունում կորոնավիրուսով տարածման պատճառով։ Տեղեկությունը հայտնում է Daily Sabah պարբերականը ՝ վկայակոչելով իր աղբյուրներին։
Ավելի վաղ Վան նահանգի իշխանությունները, որտեղ իրանցի զբոսաշրջիկներ շատ են այցելում, հատուկ տեսախցիկներ են տեղադրել Քապիքոյ և Էսենդերե սահմանային մաքսակետերում: Այժմ այդ կետերը փակ են։
Այս միջոցները ձեռնարկվել են, քանի որ մոտեցող Նովրուզի տոնին իրանցի զբոսաշրջիկների թիվն ավելանում է։
Նշենք, որ Թուրքիայի` սահմանային կետերը փակելու մասին Facebook–ի իր էջում գրում է նաև իրանագետ Կարեն Հովհաննիսյանը։ «Հայտնի դարձավ, որ Թուրքիան փակել է երկու սահմանային անցակետերը Իրանի հետ: Դրանք են՝ Վանի Քափիքոյ և Հաքքարիի Էսենդերե անցակետերը: Թուրքիան նաև դադարեցրել է դեպի Իրան և Իրանից դեպի Թուրքիա թռիչքները»,–գրել է նա:
Իրանում ՀՀ դեսպանությունը ժամանակավորապես դադարեցնում է հյուպատոսական բաժնի աշխատանքը
Վերջին տվյալների համաձայն ՝ Իրանում արդեն գրանցվել է կորոնավիրուսով վարակման 43 դեպք։ Զոհերի թիվը հասել է 8-ի։ Իրանում ՀՀ դեսպանության հյուպատոսական բաժինը փետրվարի 23 – ից ժամանակավորապես դադարեցրել է աշխատանքը ՝ քաղաքացիների մուտքն ու ընդունելությունը: Բացի այդ, ՀՀ ԱԳՆ-ն քաղաքացիներին կոչ է արել առանց խիստ անհրաժեշտության չմեկնել Իրան կորոնավիրուսի հետ կապված իրավիճակի պատճառով:
