ԵՐԵՎԱՆ, 23 փետրվարի — Sputnik. Ազգային ժողովի առողջապահության և սոցիալական հարցերի հանձնաժողովի նախագահ Նարեկ Զեյնալյանը Facebook-ի իր էջում գրառում է կատարել Իրանի տարածքում կորոնավիրուսի տարածման մասին և նշել,
«Տեղեկացնեմ, որ այսօր խոսել եմ ՀՀ փոխվարչապետ Տիգրան Ավինյանի հետ և քննարկել ենք կորոնավիրուսի շուրջ ստեղծված իրավիճակը։ Ամենօրյա ռեժիմով ստացվում է տեղեկատվություն, ինչը վերլուծության է ենթարկվում, ամենայն մանրամասնությամբ գնահատվում են հնարավոր ռիսկերը և բոլոր հնարավոր զարգացումները։Օրակարգում են վիրուսի ներթափանցման կանխման բոլոր տարբերակները՝ ընդհուպ մինչև Մեղրիի սահմանային անցակետի ժամանակավոր փակման հարցը»,– գրել է նա։
Հիշեցնենք, որ Իրանի իշխանություններն արդեն իսկ հայտարարել են կորոնավիրուսի հայտնաբերման 28 դեպքի մասին, որի հետևանքով 5 մարդ է մահացել։
Չինաստանում կորոնավիրուսից 2346 մարդ է մահացել
ՀՀ առողջապահական և աշխատանքի տեսչական մարմնի ղեկավար Հակոբ Ավագյանի հանձնարարությամբ աշխատանքային խումբ է ուղարկվել Մեղրիի բժշկական կենտրոն, հայ-իրանական սահմանի անցակետում ուժեղացնելու անվտանգությունը, որպեսզի կասկածելի դեպքերում հնարավոր լինի անհապաղ մեկուսացնել հնարավոր վարակվածին։ Հայաստանում դեռ ոչ ոքի մոտ վտանգավոր վարակի նշաններ չեն հայտնաբերվել:
Նշենք, որ այսօր Իրանի Իսլամական Հանրապետությունում ՀՀ դեսպանությունը ժամանակավորապես դադարեցրել է հյուպատոսական բաժնի աշխատանքը։
