ԵՐԵՎԱՆ, 23 փետրվարի — Sputnik. Daily Mail-ը գրում է, որ ամերիկյան ռեալիթի շոուի աստղ Քիմ Քարդաշյանը, նրա քույրերը՝ Քորթնին և Քլոյեն և նրանց կրտսեր եղբայրը` Ռոբը, հարգանքի տուրք են մատուցել իրենց հանգուցյալ հորը՝ Ռոբերտ Քարդաշյանին ծննդյան օրվա կապակցությամբ։
«Ծնունդդ շնորհավոր, պապ։ Անսահման կարոտում եմ քեզ։ Հուսով եմ, ուր էլ լինես, կտեսնես այս ամենը»,-Instagram-ի իր էջում հոր հետ լուսանկարին կից գրել է Քիմը։
Նրա ավագ քույրը՝ Քորթնի Քարդաշյանը, հոր ծննդյան օրվա առիթով նույնպես լուսանկար է հրապարակել։ Լուսանկարում մանկահասակ Քիմը և Քորթնին համբուրում են հորը։
«Շնորհավոր ծնունդդ հայրիկ»,- լուսանկարին կից գրել է Քորթնին։
Իրենց հանգուցյալ հորը շնորհավորել են նաև Քլոյեն և Ռոբը, որը Twitter-ում հոր հետ լուսանկար է հրապարակել։
Նշենք, որ Ռոբերտ Քարդաշյանը ծնվել է 1944 փետրվարի 22-ին։ Նա ամերիկահայ փաստաբան էր, որը հայտնի էր դարձել ամերիկյան ֆուտբոլիստ Օ Ջեյ Սիմփսոնի գործը հաղթելով։ Ռոբերտ Քարդաշյանը մահացել է 2003 թվականին՝ 59 տարեկան հասակում։
