ԵՐԵՎԱՆ, 20 փետրվարի — Sputnik. Այսօր ՀՀ նախկին նախագահ Սերժ Սարգսյանի եղբորորդու` Հայկ Սարգսյանի գործով դատական նիստում այսօր ընթերցեցին վկա Աշոտ Սիմոնյանի ցուցմունքները։
Հայկ Սարգսյանը մեղադրվում է 11 տարի առաջ տեղի ունեցած սպանության փորձի և ապօրինի զենք-զինամթերք պահելու համար: Նրան մեղադրանք է առաջադրվել ՀՀ ՔՕ 34-104-րդ հոդվածի 1-ին (սպանության փորձ) մասի և 235-րդ հոդվածի 1-ին մասի (զենք–զինամթերք ձեռք բերել և պահել) հատկանիշներով։
Այս գործով վկա Աշոտ Սիմոնյանը, որը տուժած Դավիթ Սիմոնյանի հայրն է, իր ցուցմունքում նշել է, որ 2007 թվականի ապրիլի 1–ին որդին երկար ժամանակ չի պատասխանել հեռախոսազանգերին։
«Սերժ Սարգսյանին կանչել էի, որ գովազդեր». Խաչատուր Սուքիասյանը` «Ռոսիա մոլի» բացման մասին
«Երեկոյան 8–ի կողմերը մի կին պատասխանեց հեռախոսազանգին, ասաց, որ որդուս վիճակը ծանր է, նրան վիրահատում են։ Հիվանդանոցում մեզ ասացին, որ Դավիթի վրա կրակել են։ Ասացին նաև, որ վնասվել է Դավիթի ողնաշարի մի ողը, որը վերականգնել հնարավոր չէ։ Բժիշկները ստիպված էին եղել հեռացնել նաև Դավիթի մի երիկամը։ Դավիթը գտնվում էր անգիտակից վիճակում։ Իմ հարցին՝ ո՞վ է կրակել իմ որդու վրա, պատասխանում էին, որ չգիտեն։ Ընկերների խոսակցությունից իմացա, որ Դավիթի վրա կրակել են Ալեքսանդր Սարգսյանի տան պադվալում», – ցուցմունքում պատմել է երիտասարդի հայրը։
Հիվանդանոցում Դավիթի բարեկամներին դիմավորել է առողջապահության նախարարը, ինչը նրանց տարօրինակ է թվացել։ Հիվանդանոցում նրանց է մոտեցել մի տղամարդ, որը ներկայացել է որպես Ալեքսանդր Սարգսյանի ընտանիքի ընկեր։
«Նա ներկայացավ որպես Արթուր Ղևոնդյան, ասաց, որ պատահական են որդուս վրա կրակել, թմրանյութերի ազդեցության տակ, որ նման բան չպետք է կատարվեր, որ նա ցավում է։ Հարցիս` ով է կրակել, ասաց, որ Ալեքսանդր Սարգսյանի որդիներից մեկը», – նշված է տուժածի հոր ցուցմունքում, որն ընթերցում էր դատախազը։
Ղևոնդյանը Սիմոնյանի ընտանիքին առաջարկել է մոռանալ կատարվածը, խոստացել է հոգալ բոլոր ծախսերը։ Խոսակցության ընթացքում հորը հաջողվել է պարզել, որ հենց Հայկ Սարգսյանն է կրակել Դավթի վրա։
Հայկ Սարգսյանը, որը վկայի ցուցմունքն ընթերցելու ժամանակ նիստերի դահլիճում էր, հրաժարվեց պատասխանել ցուցմունքին։
Հիշեցնենք` Հայաստանի նախկին նախագահի եղբորորդուն ձերբակալել էին 2018 թվականին «Զվարթնոց» օդանավակայանում, որտեղից նա պատրաստվում էր Ֆրանսիա մեկնել։ Ավելի ուշ Հայկ Սարգսյանին ազատ էին արձակել 50 միլիոն դրամ գրավի դիմաց (104 հազար դոլար)։
