ԵՐԵՎԱՆ, 20 փետրվարի — Sputnik, Լաուրա Սարգսյան. Եթե կորոնավիրուսը տարածվի Իրանում, դա կազդի Հայաստանի զբոսաշրջության վրա։ Տուրիզմի հայկական ֆեդերացիայի նախագահ Մեխակ Ապրեսյանը կարծում է, որ իրանցի զբոսաշրջիկների հոսքը, բնականաբար, կկրճատվի։
Վերջին տվյալներով` Իրանում կորոնավիրուսով վարակվելու 5 դեպք է արձանագրվել` Ղոմ քաղաքում՝ 4 դեպք, որից 2-ը՝ մահվան ելքով, և 1 դեպք Արաք քաղաքում։ ՀՀ առողջապահության նախարարությունն ավելի վաղ տեղեկացրել էր, որ «Մեղրի» անցակետում ավելի կուժեղացվի հսկողությունը՝ Իրանում կորոնավիրուսի տարածման հետ կապված։
Ապրեսյանն ավելացրեց, որ Երևանի ու Թեհրանի միջև յուրահատուկ, վստահելի հարաբերություններ վաղուց են հաստատվել, ու մեր երկրում միշտ ուրախ են տեսնել իրանցի զբոսաշրջիկներին։ Հայաստան այցելող օտարերկրացիների շարքում Իրանը երրորդ տեղն է զբաղեցնում` զիջելով Ռուսաստանին ու Վրաստանին։ 2019 թվականի հունվար–սեպտեմբեր ամիսներին Իրանից Հայաստան է եկել 132 388 զբոսաշրջիկ։ Նրանց հոսքը սովորաբար մեծանում է մարտին` Նովրուզի ժամանակ։
Չվերթերն ու փոխադրումները չեն չեղարկվել
Իրանում կորոնավիրուսով վարակվելու դեպքերի մասին նորությունն իհարկե չէր կարող չանհանգստացնել բեռնափոխադրումներով ու ուղևորափոխադրումներով զբաղվող ընկերություններին։ Սակայն իրավիճակը ծայրահեղ չէ, հատկապես որ ոչ ոք մտադիր չէ սահմանափակել իրանական ուղղությամբ իր գործունեությունը։
Armenia Airways ընկերության գլխավոր տնօրեն Առլեն Դավուդյան-Զարնաին Sputnik Արմենիայի հետ զրույցում վստահեցրեց, որ Երևան–Թեհրան–Երևան չվերթերը չեն չեղարկվի։
«Այդ մասին նույնիսկ խոսք չկա։ Բոլոր ավիաընկերությունները Քաղավիացիայի կոմիտեից անվտանգության միջոցներ ձեռնարկելու հրահանգ են ստացել։ Այդ հրահանգն արվել է Չինաստանում կորոնավիրուսի տարածման մասին լուրերից անմիջապես հետո, – նշեց Դավուդյան-Զարնաին։
Նա ընդգծեց, որ վարակն ամբողջ աշխարհում է տարածվում, հետևաբար ցանկացած ուղղությամբ չվերթ իրականացնելու դեպքում էլ պետք է զգոն լինել։
Բեռնափոխադրումներ իրականացնող «Սաթի» ընկերության տնօրեն Մակար Առաքելյանն էլ Sputnik Արմենիայի թղթակցի հետ զրույցում ընդգծեց, որ մշտապես կապի մեջ է Իրանի գործընկերոջ հետ, ու իրենք սովորական ռեժիմով են աշխատում։
«Դեպքերն արձանագրվել էին Ղոն ու Արաք քաղաքներում, իսկ մենք բեռները բերում ենք Բենդեր Աբաս նավահանգստից ու Թեհրանից», – պարզաբանեց Առաքելյանը։
Նրա խոսքով` քանի դեռ Հայաստանի իշխանությունը պաշտոնական կարգադրումներ չի արել, բեռները սովորական ռեժիմով են տեղափոխվելու։
«Մեր դասախոսներից մեկը հերոսաբար մնացել է Չինաստանում». Գրիգորյան-Անտոնյան
Հայաստանի իշխանությունը կարող է սահմանափակումներ մտցնել կամ ժամանակավորապես փակել Իրանի հետ սահմանը, եթե Թեհրանը երկրի տարածքում կարանտին հայտարարի։
Ի՞նչ է կատարվում Իրանում
Իրանում բնակվող Արամը Sputnik Արմենիայի հետ զրույցում վստահեցրեց, որ երկրում կորոնավիրուսի հետ կապված խուճապ դեռ չկա։ Նա հայտնեց, որ որոշ սահմանափակումներ են մտցվել Ղոմում. բոլոր ուսումնական հաստատությունները փակվել են։
«Խուճապ չկա։ Հուսանք` վարակը չի տարածվի։ Մենք անվտանգության միջոցների մասին տեղեկություն ենք ստանում իշխանությունից», – ասաց Արամը։
Երևանում Իրանի դեսպանատնից Sputnik Արմենիկային նույնպես ասացին, որ Թեհրանն ամեն ինչ անում է կորոնավիրուսի դեմ պայքարելու համար։ Այդ նպատակով արդեն հատուկ հանձնաժողով է ստեղծվել։
Վերջին տվյալների համաձայն` Չինաստանում արձանագրվել է կորոնավիրուսի 74 675 հաստատված դեպք, որից 2121-ը` մահվան ելքով: Ծանր վիճակում են 11864-ը, առողջացել են 16192-ը:
Երևանի հիվանդանոցները գերծանրաբեռնված են. 351 երեխայի տուն են ուղարկել
