Քաղտեխնոլոգ Արմեն Բադալյանի կարծիքով` «Այո»–ի գործունեության բովանդակությունը քաղաքական է, մինչդեռ «Ոչ»–ինը` զուտ իրավական։ «Ոչ»-ի կողմնակիցները, ըստ քաղտեխնոլոգի, փորձելու են քարոզարշավի ընթացքում ցույց տալ, որ գործընթացը չի համապատասխանում Սահմանադրությանը։
«Բախվելու են քաղաքական ու իրավական միտքը, ինչը նորմալ չէ։ Այսպես է ստացվել, որովհետև իշխանությունը վերջին երկու տարում բոլոր ընտրություններում կիրառում է սև–սպիտակի քաղաքականությունը, ինչը հատկապես հեղափոխության օրերին տալիս էր որոշակի արդյունք, հետևաբար քաղաքական ուժերն այս անգամ չցանկացան ընկնել սև–սպիտակի բովանդակության մեջ։ Այժմ արդեն իշխանության համար դժվար կլինի կիրառել սև–սպիտակի տեխնոլոգիան»,– ասաց նա։
Բադալյանի գնահատմամբ` «Ոչ»–ի շտաբը նույնիսկ կարող է հաղթող դուրս գալ, որովհետև հակառակ կողմի մոտիվացիան, ըստ քաղտեխնոլոգի, շատ թույլ է։ Ըստ այդմ` նրանք պետք է համոզեն մարդկանց գնալ և քվեարկել 7 դատավորների դեմ, մինչդեռ շատերն այդ դատավորների հետ նույնիսկ առնչություն չունեն։
ՀՀԿ–ն չի մասնակցի սահմանադրական հանրաքվեի քարոզարշավին
«Մյուս կողմից իրավագետներն ուզեն, թե չուզեն քարոզարշավի ընթացքում պետք է քաղաքական թեզեր դնեն շրջանառության մեջ, որովհետև սա զուտ դատական գործընթաց չէ, որ խոսեն միայն իրավունքի բնագավառից։ Հանրաքվեն նախևառաջ քաղաքական գործընթաց է, և այստեղ քաղաքական փաստարկներն են մարդկանց կողմնորոշում «այո» ասել, թե «ոչ»»,– նշեց քաղտեխնոլոգը։
ՀՅԴ–ն հորդորում է անտեսել հանրաքվեն
Բադալյանի համոզմամբ` հնարավոր չէ միայն իրավական փաստարկներով հաղթանակ տանել քաղաքական գործընթացում, ուստի պետք է շատ զգույշ լինել և կշռադատված քայլեր ձեռնարկել։
