ԵՐԵՎԱՆ, 11 փետրվարի — Sputnik. Ալ. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար Կոնստանտին Օրբելյանը լրագրողների հետ հանդիպմանը տեղեկացրեց, որ դատարանն իր օգտին որոշում է կայացրել, և նա կրկին ստանձնել է օպերային թատրոնի տնօրենի պարտականությունները:
«Փետրվարի 10-ից կրկին թատրոնի տնօրենն եմ։ Իմ՝ դատը շահելուց հետո, նախարարությունը դիմել էր վերաքննիչ, սակայն վերաքննիչը մերժել էր նախարարության բողոքը»,–ասաց Օրբելյանը։
Նրա խոսքով` թատրոնի տնօրենի պաշտոնում շարունակելու է աշխատանքը մինչև պայմանագրի ավարտը՝ 2020-ի օգոստոսի 3-ը։
Հիշեցնենք` Կոնստանտին Օրբելյանը դատի էր տվել ՀՀ կրթության գիտության, մշակույթի և սպորտի նախարարությունը` պահանջելով անվավեր ճանաչել իրեն աշխատանքից ազատելու` մարտի 28–ի հրամանը։ Երևանի ընդհանուր իրավասության դատարանը հոկտեմբերի 8-ին վճիռ էր կայացրել հօգուտ Օրբելյանի։ Սակայն նախարարությունը վերաքննիչ դատարան բողոք էր ներկայացրել` Երևանի ընդհանուր իրավասության դատարանի որոշման դեմ։
«Կգրկեմ ու կհամբուրեմ Նազենի Ղարիբյանին». Օրբելյան
Օրբելյանն «Ալեքսանդր Սպենդիարյանի անվան օպերայի և բալետի ազգային ակադեմիական թատրոն» ՊՈԱԿ-ի տնօրենի թափուր պաշտոնում նշանակվել էր 2017թ. օգոստոսի 3–ին։
