ԵՐԵՎԱՆ, 10 փետրվարի — Sputnik. Հորդանանի Հաշիմյան թագավորության Արդյունաբերության, առևտրի և մատակարարումների նախարար Թարիք Համմուրին Երևանում անցկացվող Հայաստան–Հորդանան գործարար համաժողովի իր ելույթում նշեց, որ երկու երկրների քաղաքական հարաբերությունները պետք է իրենց անդրադարձն ունենան նաև տնտեսական հարաբերությունների վրա։
«Հայաստանի վերջին տարիների տնտեսական աճի ցուցանիշները բավական տպավորիչ են, և, կարծում ենք` դա ոչ թե պատահականության, այլ հստակ, ինտենսիվ մեթոդաբանության արդյունք է»,– ասաց հորդանանցի պաշտոնյան` շեշտելով Հայաստանի զբոսաշրջության ու թվային տեխնոլոգիաների ոլորտներում գրանցված ցուցանիշները։
ՀՀ Էկոնոմիկայի նախարար Տիգրան Խաչատրյանը որպես երկու երկրների տնտեսական հարաբերությունների ամենահեռանկարային ոլորտ նշեց զբոսաշրջությունը` միաժամանակ հավելելով, որ թվերն այս պահին այնքան էլ ոգևորող չեն։
Մեկ օրում Հորդանանից և Լիբանանից մոտ 1500 փախստական է վերադարձել Սիրիա
Անցյալ տարի Հայաստան այցելած 1.9 մլն զբոսաշրջիկների մեջ, նախարարի խոսքով, Հորդանանից այցելողներն ընդամենը 2000 են եղել։
Խաչատրյանը հայտնեց նաև, որ հորդանանյան կողմը հետաքրքրված է նաև Հայաստանի` թե՛ վերամշակված, թե՛ չվերամշակված գյուղատնտեսական արտադրանքով։ Իսկ թեթև արդյունաբերության ոլորտում Խաչատրյանը չի բացառում նաև համատեղ ծրագրերի իրականացման հնարավորությունը։
Բայց այդ ծրագրերն առայժմ միայն հեռանկարներ են։ Իրականում հայ և հորդանանցի գործարարները նոր միայն ճանաչում են միմյանց երկրների շուկաներն ու տնտեսական հնարավորությունները։
«Բիզնես ֆորումը նրա համար է, որ գործարարները հանդիպեն միմյանց, հնարավորությունները քննարկեն և իրագործեն։ Այնպես չէ, որ արդյունքները միանգամից նկատելի կլինեն, սա ճանաչողական այցելություն է։ Բայց մենք կարծում ենք, որ մեծ հաջողությունները փոքր քայլերից են սկսվելու»,– նշեց Խաչատրյանը։
Նրա դիտարկմամբ` զբոսաշրջությունից բացի առավել հավանական համագործակցության ասպարեզ է նաև առևտուրը։
«Երբ որ մենք առևտրի ակտիվացման միջոցով կունենանք ճանաչելիության ավելի մեծ հնարավորություններ ու ծավալներ, դրա հիման վրա արդեն կտեսնենք ներդրումային համագործակցության առաջին օրինակները»,– ասաց Խաչատրյանը։
ՊԵԿ հրապարակած պաշտոնական վիճակագրության համաձայն` 2018թ–ի ընթացքում Հայաստանից արտահանումների ծավալը դեպի Հորդանան կազմել է 19 700, ներկրումը` 169 200 ԱՄՆ դոլար։ 2019թ–ի առաջին կիսամյակի ընթացքում Հայաստանից արտահանվել է ընդամենը 400 դոլարի ապրանք, ներմուծվել 54 500-ի։ 2019–ի ամբողջ տարվա ցուցանիշները դեռ ամփոփված չեն։
Հորդանանի խորհրդարանի Առևտրաարդյունաբերական պալատի նախագահ Նիլ Ռաջա Կաբարիթին, լրագրողների հետ զրույցում հավաստիացրեց, որ հորդանացի գործարարներն արդեն որոշ չափով ծանոթացել են Հայաստանի տնտեսությանը և առևտրից, տուրիզմից ու գյուղատնտեսությունից բացի հետաքրքրված են նաև հայաստանյան քիմիական արտադրությամբ, շինանյութերի շուկայով ու էներգետիկ ոլորտով։
Սարգսյանը մասնակցել է Համաշխարհային տնտեսական համաժողովի տարածաշրջանային ֆորումի բացմանը
«Էներգետիկայի ոլորտ ասելով ես նկատի ունեմ այլընտրանքային էներգիան` արևային ու հողմային, քանի որ Հորդանանի Հաշիմյան Թագավորությունը բավական առաջատար է այդ ոլորտում, և հուսով եմ երկու երկրների միջև կամուրջներ կստեղծվեն նաև այդ ոլորտում»,– ասաց լիբանանցի խորհրդարանականը։
Նշենք, որ միջոցառման ընթացքում ՀՀ Էկոնոմիկայի նախարար Տիգրան Խաչատրյանի ու Հորդանանի Հաշիմյան թագավորության Արդյունաբերության, առևտրի և մատակարարումների նախարար Թարիք Համմուրիի միջև ստորագրվեց համագործակցության հուշագիր:
Հիշեցնենք` Հայաստանում է նաև Հորդանանի թագավոր Աբդալլահ Երկրորդը։ Նա Հայաստան է ժամանել երկօրյա այցով՝ ՀՀ նախագահ Արմեն Սարգսյանի հրավերով:
