ԵՐԵՎԱՆ, 5 փետրվարի — Sputnik. ԱԺ-ն փետրվարի 6-ի արտահերթ նիստում պատրաստվում է քննարկել «ՀՀ Սահմանադրությունում փոփոխություններ կատարելու մասին» օրենքի նախագիծը, որը, ըստ էության, Սահմանադրական դատարանի նախագահ Հրայր Թովմասյանին, ինչպես նաև ՍԴ–ի «հնաբնակներին» պաշտոնանկ անելու նպատակ ունի։ Այս անգամ այդ նպատակին հասնելու համար «Իմ քայլը» ստիպված կլինի Սահմանադրություն խախտել։
Նախագծով առաջարկվում է 2015 թվականի դեկտեմբերի 6-ին փոփոխված Սահմանադրության 213-րդ հոդվածը շարադրել նոր` հետևյալ խմբագրությամբ. «մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների պաշտոնավարումը դադարում է»:
Նույն հոդվածը նախատեսում է նաև նրանց թափուր մնացած տեղերի լրացման կարգը։ Նոր թեկնածուներին պետք է առաջադրեն հաջորդաբար` կառավարությունը, հանրապետության նախագահը և դատավորների ընդհանուր ժողովը: «Սույն փոփոխություններով հոդվածի 1-ին մասի հիման վրա առաջացած թափուր տեղերը համալրելու ընթացակարգը և ժամկետները սահմանվում են «Սահմանադրական դատարանի մասին» սահմանադրական օրենքով նախատեսված հատուկ ընթացակարգով, որոնք պետք է ընդունվեն և ուժի մեջ մտնեն մինչև 2020 թվականի ապրիլի 1-ը»,– նշված է նախագծում։
Թովմասյանի անմեղության կանխավարկածը ռեպորտաժում խախտվել է, բայց ՀՌՀ–ն ոչինչ անել չի կարող
Օրինագիծն ընդունվելու դեպքում ուժի մեջ կմտնի պաշտոնական հրապարակմանը հաջորդող օրվանից:
Նախագծի հեղինակը ԱԺ «Իմ քայլը» խմբակցության պատգամավոր Վահագն Հովակիմյանն է։ Իր նախաձեռնությունը նա հիմնավորում է ՍԴ–ի ներսում ու դրա շուրջ ստեղծված ճգնաժամի հանգուցալուծմամբ։
«ՍԴ ճգնաժամի առաջնային խնդիրը նախկինում նշանակված անդամների և 2015թ.-ի փոփոխություններով Սահմանադրության 7-րդ գլխով ընտրվող դատավորների պաշտոնների ակնհայտ բովանդակային տարբերությունն է, որի մասին իրավական հանրությունում քննարկումները գնալով ավելի են թեժանում»,– ասված է հիմնավորման մեջ։
Բացի այդ, ՍԴ ներկայիս կազմը պահպանելու դեպքում, նախագծի հեղինակի համոզմամբ, խախտվում է ՍԴ ներդատարանական հավասարությունը, քանի որ 2015թ.-ից հետո ընտրված դատավորների և մինչ այդ նշանակված անդամների պաշտոնավարման ժամկետները տարբեր են` նորընտիր դատավորները պաշտոնավարում են 12 տարով, նախկինում նշանակված անդամները` մինչև 70 տարեկանը, իսկ 2005թ.-ի Սահմանադրությամբ նշանակված մյուս 5 անդամները` մինչև 65 տարեկանը։
Ինչ վերաբերում է առաջարկվող նախագիծն ընդունելու դեպքում գործող Սահմանադրությունը խախտելուն, նախագծի հեղինակներն այդ մեղադրանքներին հետևյալ կերպ են հակադարձում. «7-րդ գումարման ՀՀ Ազգային ժողովը, որպես վերջին 20 տարիների ընթացքում ազատ ընտրության իրավունքի բոլոր երաշխիքների և Սահմանադրության 2-րդ հոդվածի անշեղորեն պահպանմամբ ձևավորված ժողովրդավարական առաջնային մանդատով օժտված բարձրագույն մարմին, որն ունի Սահմանադրության փոփոխություն կատարելու լիազորություն, այսպիսով նպատակ ունի վերջնական և հիմնարար լուծում տալ ՍԴ-ի 2015թ.-ի Սահմանադրության 7-րդ գլխի կանոններով ձևավորման խնդրին»:
Փաշինյանի դեմ հայցադիմումը շուտով պատրաստ կլինի. Թովմասյանի պաշտպան
Բանն այն է, որ ՀՀ Սահմանադրության 168-րդ հոդվածը նախատեսում է, որ գործող Սահմանադրության ցանկացած փոփոխության համար անհրաժեշտ է Սահմանադրական դատարանի որոշումն այն մասին, որ այդ փոփոխությունը չի հակասում Սահմանադրությանը։ Անցումային դրույթները հնարավոր է փոփոխել ԱԺ պատգամավորների ընդհանուր թվի 2/3-ով։ Սա նշանակում է, որ փետրվարի 6-ին իշխող քաղաքական ուժին անհրաժեշտ կլինի ստանալ ԱԺ 131 պատգամավորներից առնվազն 88-ի ձայնը։ Ճիշտ այդքան պատգամավոր ունի «Իմ քայլը» խմբակցությունը։
