ԵՐԵՎԱՆ, 4 փետրվարի — Sputnik. ՀՖՖ նախկին նախագահ Ռուբեն Հայրապետյանի փաստաբանին թույլ չեն տվել տեսակցել նրան։ Տեղեկությունը պաշտպան Ամրամ Մակինյանը հայտնեց Ոստիկանության 6-րդ վարչության մուտքի մոտ հավաքված լրագրողներին։
«15 րոպե ինձ սպասեցնում է հերթապահ ծառայությունը։ Այս պահին պաշտոնական պատճառաբանությունն այն է, որ պետը տեղում չէ, չեն կարողանում անցագիր իջեցնել»,– ասաց նա` հավելելով, որ սա առաջին դեպքը չէ։
Փաստաբանն այս պատճառաբանության վրա հրավիրեց ոստիկանության ղեկավարների ուշադրությունն ու առաջարկեց գործողություններ ձեռնարկել միայն այն ժամանակ, երբ պետերը տեղում են լինում։
Ամրամ Մակինյանը մամուլից է տեղեկացել, որ Քննչական կոմիտեն հայտնել է, որ Ռուբեն Հայրապետյանին բերման ենթարկելը որևէ առնչություն չունի ՀՖՖ–ում առերևույթ չարաշահումների առիթով հարուցված քրեական գործի հետ։
«Պարոն Հայրապետյանը ինձ չկարողացավ պատճառաբանել, որովհետև իրեն էլ չէին պատճառաբանել, թե ինչու է բերման ենթարկվում։ Մենք այս պահին չգիտենք»,– ասաց Մակինյանը։
Փաստաբանը խոստացավ տեղեկություններ ստանալուց հետո այդ մասին հայտնել 6-րդ վարչության մոտ հավաքված լրագրողներին։
ՀՖՖ-ի շուրջ նոր բացահայտումներ են սպասվում. գործին խառն են տեղակալները. «Ժողովուրդ»
Հիշեցնենք` նոյեմբերի 13-ին Ոստիկանության 6-րդ վարչության աշխատակիցները խուզարկություններ էին իրականացրել Ռուբեն Հայրապետյանի առանձնատանն ու նրան պատկանող այլ շինություններում։ Մինչ այդ ոստիկանությունը հայտնել էր, որ ՀՖՖ նախկին նախագահին պատկանող բիզնեսների վերաբերյալ նյութեր են նախապատրաստվում։ Իրավապահները օպերատիվ տեղեկություններ էին ստացել այն մասին, որ Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանին պատկանող ընկերություններում հնարավոր են չարաշահումների դեպքեր։
Նշենք, որ մամուլի հրապարակումների համաձայն` Ռուբեն Հայրապետյանը «Զարգացման հայկական բանկի» և «Զեյթունի կահույքի ֆաբրիկա» ԲԲԸ-ի փաստացի սեփականատերն է։ 2012 – 2018 թթ., զբաղեցնելով ՀՖՖ նախագահի պաշտոնը, Հայրապետյանը ՀՀ մի քանի քաղաքներում կազմակերպել է ֆուտբոլի մարզադաշտերի ու մարզադպրոցների կառուցման և վերանորոգման աշխատանքներ, որոնց ընթացքում չի կատարել կամ մասնակի է կատարել պայմանագրերով նախատեսված պարտավորությունները և յուրացրել առանձնապես խոշոր չափերի գումարներ:
Հայրապետյանի նկատմամբ 4 հոդվածով քրեական գործ է հարուցվել։ Քրգործը հարուցվել է ՀՀ քրեական օրենսգրքի մի քանի հոդվածներով. 315-րդ հոդվածի 2-րդ մաս (պաշտոնեական անփութություն, որն անզգուշությամբ առաջացրել է ծանր հետևանքներ), 179-րդ հոդվածի 3-րդ մաս (խոշոր չափերով յուրացում), 325-րդ հոդվածի 2–րդ մաս (մի խումբ անձանց կողմից փաստաթղթեր կեղծելը) և 214-րդ հոդվածի 2-րդ մաս (առևտրային կամ այլ կազմակերպությունների ծառայողների կողմից լիազորությունները չարաշահելը):
